Լիտվայի պետական արխիվի կայքում վերականգնվել են Հայոց ցեղասպանության մասին հրապարակումները

Արմինֆո. Լիտվայի պետական արխիվի կայքում վերականգնվել են Հայոց ցեղասպանության մասին հրապարակումները, հաղորդում է orer.eu կայքը։

"Մայիսի 8 - ին Լիտվայի կառավարական շրջանակներից տեղեկություն է ստացվել, որ Հայոց ցեղասպանությանը նվիրված բոլոր հրապարակումները վերականգնվել են արխիվի կայքում", - ասված է հաղորդագրության մեջ:

Ավելի վաղ delfi.lt-ն՝ արխիվի աշխատակցին հղումով տեղեկացրել էր, որ Լիտվայի կենտրոնական պետական արխիվը, Արտաքին գործերի նախարարությունից և Թուրքիայի դեսպանատնից ստանալով ոչ պաշտոնական "ազդակ", հեռացրել էր Օսմանյան կայսրությունում Հայոց ցեղասպանության վերաբերյալ հրապարակումը:

Մինչդեռ, Գլխավոր արխիվարիուսի ծառայության ղեկավար Ինգա Զակշաուսկենեն հաստատել էր, որ ապրիլի 28-ին այդ հարցով շտապ հանդիպում է կազմակերպվել Թուրքիայի դեսպանատան ներկայացուցիչների հետ, որի ընթացքում ահազանգեր են ստացվել, թե, իբր, արխիվը փորձում է քաղաքականացնել Հայոց ցեղասպանության հարցը: "Մտահոգություններ են հնչել այն մասին, թե ինչու է պետական արխիվն իրեն թույլ տվել հրապարակել, հնարավոր է, քաղաքական հարցեր", - հաղորդել է Զակշաուսկենեն:

Գլխավոր արխիվագետը ընդգծել է, որ իր ղեկավարած ծառայությունն ու արխիվը ապաքաղաքական են: "Ես չեմ տեսնում, որ արխիվն իր հրապարակման մեջ զբաղվի որևէ հարցի քաղաքականացմամբ։ Ռուսաստանը նույնպես չի ընդունում, որ լիտվացիներին աքսորել է Սիբիր, բայց մենք դա չենք քննարկում։ Թուրքիան նույնպես նման տեսակետ ունի (Հայոց ցեղասպանության հարցում), բայց դա նրանց տեսակետն է", - հայտարարել է նա։

"Այժմ էլ իմ դիրքորոշումն այն է, որ դա բացարձակ ապաքաղաքական հարց էր. դա պատմական փաստերի արձանագրում է, որոնք հաստատվել են գիտական հետազոտություններով", - ընդգծել է Լիտվայի գլխավոր արխիվարիուսը: Նրա խոսքով ՝ Թուրքիայի դեսպանատնից ոչ մի պաշտոնական հարցում կամ բողոք չի ստացվել. հանդիպման ձեւաչափը ավելի շատ փափուկ ուժի միջոցներ էր հիշեցնում:

"Ես բացարձակապես ոչ մի պաշտոնական նամակ կամ զանգ չեմ ստացել ։ Պարզապես այց է եղել, ես այն կբնութագրեի որպես փափուկ ուժի գործիք, որը կոչված է բացատրելու իմ դիրքորոշումը ՝ քաղաքավարի հիշեցնելով, որ մենք կարող ենք ընդհանուր եզրեր փնտրել Թուրքիայի և Լիտվայի պատմության մեջ, որոնք, անկեղծ ասած, այնքան էլ շատ չեն", - ընդգծել է Զակշաուսկենեն։

Մինչդեռ արխիվի փաստաթղթերի տարածման բաժնի ղեկավար Ջուգինտա Աբրոմայտենեն հայտարարել է, որ իրեն այդ հարցով ոչ պաշտոնապես զանգահարել են Արտաքին գործերի նախարարության ներկայացուցիչները: "ԱԳՆ - ը մտահոգություն է հայտնել, թե արդյոք արխիվի կողմից սոցիալական ցանցերում հրապարակված գրառումը չի վնասի Լիտվայի եւ Թուրքիայի միջեւ երկարատեւ հարաբերություններին", - ասել է նա իր պատասխանում: Իր հերթին, ԱԳՆ-ը հերքել է վերոնշյալ հաստատություններին այդ հարցի վերաբերյալ առաջարկություններ տալու փաստը:

"ԱԳՆ-ն որևէ հանձնարարական չի տվել ոչ արխիվների դեպարտամենտին, ոչ գլխավոր արխիվարիուսի ծառայությանը, ոչ էլ որևէ այլ պետական հաստատության՝ այդ հարցի վերաբերյալ", - ասված է ԱԳՆ-ի պատասխանում:

2005թ. Լիտվայի Սեյմը ընդունել է Օսմանյան կայսրությունում 1914-1918 թթ.հայ ժողովրդի ցեղասպանությունը դատապարտող բանաձև: Միեւնույն ժամանակ, Եվրոպական խորհրդարանը հայ ժողովրդի ցեղասպանությունը ճանաչել է 2015թ. ապրիլի 15-ի բանաձևով: Թուրքիան, ընդհակառակը, չի ընդունում, որ Օսմանյան կայսրությունում իրականացվել է հայ ժողովրդի ցեղասպանություն։