ՀՀ քննչական կոմիտեն ճշտել է Սուրբ Աննա եկեղեցում Փաշինյանին առնչվող միջադեպի մասնակիցներին առաջադրված մեղադրանքները

Արմինֆո. ՀՀ քննչական կոմիտեն պարզաբանել է, թե ինչում են մեղադրվում Երևանի Սուրբ Աննա եկեղեցում վարչապետ Նիկոլ Փաշինյանի հետ տեղի ունեցած միջադեպի մասնակիցները:

«2026 թվականի մարտի 29-ին Սուրբ Աննա եկեղեցում տեղի ունեցած միջադեպի առթիվ նախաձեռնված քրեական վարույթի նախաքննության ընթացքում Դ.Մ.-ի նկատմամբ հարուցվել է հանրային քրեական հետապնդում՝ Քրեական օրենսգրքի 297-րդ հոդվածի 1-ին մասով (խուլիգանությունը) և 452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելը), Մ.Մ.-ի նկատմամբ՝ 46-297-րդ հոդվածի 1-ին մասով (խուլիգանությանն աջակցելը) և 46-452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելուն աջակցելը) և Գ.Գ.-ի նկատմամբ՝ 46-297-րդ հոդվածի 1-ին մասով (խուլիգանությունը կազմակերպելը) և 46-452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելը կազմակերպելը)», - հաղորդել է Քննչական կոմիտեի մամուլի քարտուղար Կիմա Ավդալյանը՝ «Ֆեյսբուքի» իր էջում:

Հիշեցնենք, որ մարտի 29 - ին Սուրբ Աննա եկեղեցում պատարագի ընթացքում միջադեպ էր տեղի ունեցել վարչապետ Նիկոլ Փաշինյանի մասնակցությամբ։ Երբ  վերջինս թիկնազորի ուղեկցությամբ շարժվել է դեպի ելք, ներկաներից մեկը ձեռքով կտրուկ շարժում է կատարել վարչապետի ուղղությամբ, սակայն նրա ձեռքը թիկնապահները հետ են մղել։ Դրանից հետո եկեղեցում իրարանցում է առաջացել։ Ավելի ուշ ձերբակալվել են 18 - ամյա երկվորյակ եղբայրներ Դավիթ և Միքայել Մինասյանները, ինչպես նաև հասարակական և քաղաքական գործիչ Գևորգ Գևորգյանը: Փաստաբան Լուսինե Մարտիրոսյանի խոսքով ՝ Մինասյան եղբայրները դպրոցականներ են, իսկ երրորդ ձերբակալվածը նրանց հետ կապ չունի: Բացի այդ, նրա խոսքով, եղբայրները չեն կարող կալանքի տակ գտնվել առողջական խնդիրների պատճառով։ Մարտի 30-ին Քննչական կոմիտեի աշխատակիցները խուզարկություն են իրականացրել Մինասյան եղբայրների տանը։