"Ալմաստ" ԲԲԸ-ի անվամբ շուրջ 132 հազար դոլար արժողությամբ հողի սեփականության իրավունքի պետական գրանցումն անվավեր է ճանաչվել. Գլխավոր դատախազություն

Արմինֆո. Գլխավոր դատախազության պետական շահերի պաշտպանության վարչության հերթական հայցը Վարչական դատարանի 2026 թվականի փետրվարի 13-ի վճռով բավարարվել է. անվավեր է ճանաչվել «Ալմաստ» ԲԲԸ-ի անվամբ 2006 թվականի մարտի 17-ին կատարված իրավունքի պետական գրանցումը: Այդ մասին հաղորդում է Գլխավոր դատախազության մամուլի ծառայությունը։

«Գլխավոր դատախազության պետական շահերի պաշտպանության վարչությունը հայցադիմումով դատարանից պահանջել էր անվավեր ճանաչել Կադաստրի կոմիտեում «Ալմաստ» ԲԲ ընկերության անվամբ Երևան քաղաքի Ռուբինյանց 28 հասցեում գտնվող՝ 1296 քմ մակերեսով հողամասի նկատմամբ կատարված սեփականության իրավունքի պետական գրանցումը:

Դատական ակտն օրինական ուժի մեջ մտնելուց հետո, շուրջ 132.000 ԱՄՆ դոլարին համարժեք 49 միլիոն 623 հազար դրամ շուկայականին մոտարկված կադաստրային արժեքով հողամասի նկատմամբ կգրանցվի Հայաստանի Հանրապետության սեփականության իրավունքը», - նշվում է հաղորդագրությունում:

«Ալմաստ» ԲԲԸ-ն՝ արհեստական ալմաստների և «Ալմաստ» ալմաստե գործիքի արտադրության նախկին գործարանը, Հիմնադրվել է 1964թ. ապրիլին: 2001թ. հուլիսին ձեռնարկությունը սեփականաշնորհվել է «Միջազգային բիզնես-կենտրոն» ՀՁ ՓԲԸ-ի կողմից: 2009թ.մայիսին հաղորդվել էր, որ ՆԱՍԴԱՔ ՕԷՄԷՔՍ Արմենիա ֆոնդային բորսայում կնքվել է "Ալմաստ" ԲԲԸ (ALMS) 152 բաժնետոմսերի առքուվաճառքի 30 400 դրամի 1 գործարք' 200 դրամ միջին կշռված գնով: Բացման, փակման, ինչպես նաև առավելագույն և նվազագույն գները նույնպես կազմել են 200 դրամ: