Միջազգային իրավաբան․ Մայր Աթոռ Սուրբ Էջմիածնում Հայաստանի իշխանությունների գործողությունները դուրս են ինչպես ներպետական օրենսդրության, այնպես էլ միջազգային իրավունքի շրջանակներից

Արմինֆո. Հայաստանի իշխանությունների գործողությունները Մայր Աթոռ Սուրբ Էջմիածնում հակասում են Եվրոպական կոնվենցիայի 9 - րդ հոդվածին (մտքի, խղճի և կրոնի ազատության իրավունք - խմբ.) և ամբողջովին դուրս են ինչպես Հայաստանի ներպետական օրենսդրության, այնպես էլ միջազգային իրավունքի շրջանակներից: Հայտնի ամերիկականադական իրավաբան-միջազգայնագետ, քաղաքական պաշտպանության և մարդու իրավունքների ոլորտում մասնագիտացած Ռոբերտ Ամստերդամն այդպես է արձագանքել դեկտեմբերի 18-ին վարչապետ Նիկոլ Փաշինյանի հակաեկեղեցական արշավին միացած եպիսկոպոսների միջոցով Ամենայն հայոց Գարեգին Բ կաթողիկոսի հրաժարականը պահանջելու իշխանությունների փորձին: Մայր Աթոռ Սուրբ Էջմիածնի վրա Հայաստանի իշխանությունների հարձակումները, ինչպես նկատել է Ամստերդամը, վկայում են այն մասին, որ  վարչապետ Նիկոլ Փաշինյանը, փաստացի, դուրս է օրենքի շրջանակներից: "Նա ոչ միայն հանդես է գալիս որպես իրավախախտ, այլեւ, ըստ ամենայնի, մտադիր է խախտել ինչպես եկեղեցական կանոնները, այնպես էլ Հայաստանի սահմանադրությունը։ Ամոթ Բոլոր նրանց, ովքեր կատարում են նրա անօրինական հրամանները", - նշել է միջազգային իրավաբանը։

Իր հերթին՝ Ազգային ժողովի ընդդիմադիր "Հայաստան" խմբակցության պատգամավոր Իշխան Սաղաթելյանն իր Facebook-յան էջում տարածված տեսաուղերձում տեղի ունեցածը որակել է ողբերգություն: "Երեկ Մայր Աթոռ Սուրբ Էջմիածնում հայ ժողովուրդը կիսվեց ՀԱԵ-ի վրա հարձակումներ իրականացնողների և այն պաշտպանողների։ Սա խայտառակություն է մեր պետության և մեր ողջ ժողովրդի համար։ Մենք պետք է հասկանանք, որ գտնվում ենք մի իրավիճակում, երբ ստիպված ենք պաշտպանել հայկական եկեղեցին մեր իսկ հայրենիքում, եւ մենք պարտավոր ենք դա անել, քանի որ այլ տարբերակ լինել չի կարող ", - նկատեց Սաղաթելյանը։

Ընդ որում, պատգամավորը փաստել է, որ դրանով հայկական եկեղեցու վրա հարձակումները չեն դադարի, եւ համոզմունք է հայտնել, որ երկրում գործող ռեժիմը դրանք կշարունակի, նույնիսկ, ավելի մեծ ինտենսիվությամբ: "Ինչպես դեկտեմբերի 18-ին՝ մենք էլ պետք է մնանք տոկուն և համախմբված, լինենք հետևողական և պատրաստ այն բանին, որ հետագայում կրկին ստիպված ենք լինելու պաշտպանել մեր Եկեղեցին, Սուրբ Էջմիածինը և Ամենայն հայոց կաթողիկոս Գարեգին Բ-ին", - եզրափակել է պատգամավորը:

Հիշեցնենք, որ ավելի վաղ Հայ Առաքելական Եկեղեցու 10 եպիսկոպոսներ, որոնք միացել էին ՀՀ վարչապետ Նիկոլ Փաշինյանի ՝ մայիսին մեկնարկած հակաեկեղեցական արշավին ՝ Ամենայն հայոց Գարեգին Բ կաթողիկոսի հրաժարականի պահանջով, հանդես էին եկել հայտարարությամբ եւ կոչ էին արել Հայաստանի և սփյուռքի հավատացյալներին միասնական կամք դրսևորել ՝ դեկտեմբերի 18-ին, ժամը 17:00-ին գալ Մայր Աթոռ Սուրբ Էջմիածին և միանալ Գարեգին Բ-ի հրաժարականի իրենց պահանջին: Դեկտեմբերի 18-ին եպիսկոպոսները, ժամը 18:00-ին մոտ, քաղաքացիական հագուստով թիկնապահների ուղեկցությամբ շարժվել էին դեպի Մայր Տաճար: Հավատացյալները եպիսկոպոսներին դիմավորել էին "Հուդա, Հուդա" վանկարկումներով: Եպիսկոպոսները կաթողիկոսի հրաժարականի պահանջով նամակ էին հանձնել Մայր Աթոռ Սուրբ Էջմիածնի դիվանատուն և նույն թիկնազորի ուղեկցությամբ շտապ հեռացել էին Մայր Աթոռ Սուրբ Էջմիածնի տարածքից: