Հրազդանի ցեմենտի գործարանի աշխատակիցները բողոքի ակցիա են իրականացրել

Արմինֆո. Կոտայքի մարզում գտնվող" Հրազդան ցեմենտ " գործարանի աշխատակիցները բողոքի ակցիա են անցկացրել՝ ընկերության սնանկացման մասին հայտարարությունից հետո փողերի չվճարման և աշխատանքը կորցնելու առնչությամբ: Արդյունքում՝ շուրջ 400 մարդ արդեն մոտ մեկ տարի գտնվում է ծանր իրավիճակում, ի վիճակի չէ այլ աշխատանք գտնել և պահել ընտանիքը:

Լրագրողների հետ զրույցում ցուցարարներից մեկը պատմել է, որ պարտքի գումարը կազմում է մոտ 570 միլիոն դրամ: Նրա խոսքով՝ ամեն ինչ սկսվել է 2018 թվականին, երբ գործարանը գնվել է և անցել Կոլյա Խաչատուրովի տնօրինության տակ։ "Դրանից երկու տարի անց սկսվեց սնանկության գործընթացը։ Ութ տարի գործարանը ղեկավարում էր Կոլյա Խաչատուրովը, ով ձեռնարկության սնանկացումից հետո հանկարծ հայտարարեց իր ոչ լեգիտիմ լինելու մասին, դադարեց հավաքներին ներկայանալ և որևէ գործողություն ձեռնարկել: Նա պատասխանատվություն չի ստանձնում պարտքերի համար", - նշել է աշխատակիցներից մեկը։

Ցուցարարներից շատերը մոտ 40 տարի աշխատել են գործարանում և հասել այն տարիքին, երբ նոր աշխատանք գտնելը, գործնականում, անհնար է դառնում: "Մենք ունենք ընտանիքներ, ունենք պարտքեր և երեխաներ, որոնց ուսման համար պետք է վճարել։ Միևնույն ժամանակ, դատավարությունները ձգձգվում են, և տարիներ շարունակ գործով որոշումներ չեն կայացվում: Այն աշխատողները, որոնք այստեղ աշխատել են 12 ամիս, չվճարված աշխատավարձի դիմաց պետք է ստանան մոտ մեկ միլիոն դրամ (ամսական 90 հազար դրամ հաշվարկի դեպքում - խմբ.)",- հավելել են ցուցարարները։

Նրանք նաև նշել են, որ սա գործարանի սնանկացման արդեն երրորդ դեպքն է, և ամեն անգամ խնդիրները մնացել են չլուծված: "Գործարանը չի կարող սնանկանալ առանց լուրջ պատճառների։ Մենք միշտ տեղյակ ենք եղել բոլոր եկամուտների և ծախսերի մասին: Այս իրավիճակը կարող է լուրջ ազդեցություն ունենալ երկրի վրա ՝ հանգեցնելով ցեմենտի գների բարձրացման եւ դրա որակի վատթարացման", - նշել է գործարանի մեկ այլ աշխատակից։

 Ցուցարարները նաև հաղորդել են, որ պատրաստ են շարունակել իրենց բողոքի ակցիաները, այդ թվում ՝ փակել ճանապարհները, որպեսզի լսելի լինեն և հասնեն ստեղծված իրավիճակի լուծմանը, խնդիրը վերջապես լուծվի: Նրանք նաև պատմել են, որ 1.5 ամիս առաջ իրենց ընդունել են երկրի կառավարությունում, նշվել է, որ գործն ընթացքի մեջ է, սակայն այդ ժամանակից ի վեր դրա ընթացքի մասին որևէ տեղեկություն չկա:

Նշենք, որ "Հրազդան ցեմենտ" ընկերությունը (նախկին "Միկա ցեմենտ") ստեղծվել է "Հրազդանի ցեմենտի գործարանի" բազայի վրա, որը շահագործման է հանձնվել 1970 թվականին ՝ որպես "Հրազդանի լեռնաքիմիական կոմբինատի" կառուցվածքային ստորաբաժանում: 90-ականներին գործարանը, գործնականում, չէր գործում։ 2001 թվականին ձեռնարկությունը սեփականաշնորհվել է "Միկա Արմենիա" ընկերության նախագահ Միխայիլ Բաղդասարովի կողմից և վերանվանվել" Միկա-Ցեմենտ " ՓԲԸ: Ավելի ուշ գործարանը պարտքերի դիմաց հանձնվել է ՎՏԲ-Հայաստան բանկին։ Ցեմենտի գործարանը 2014թ. հուլիսին վերսկսել է իր աշխատանքը ՎՏԲ-Հայաստան բանկից ստացված վարկի շնորհիվ: Գործարանը մասնագիտանում է 10 ապրանքանիշերի պորտլանդցեմենտի արտադրության մեջ: Այն գտնվում է Հրազդան քաղաքում ՝ 540 հազար քմ մակերեսով տարածքում, հագեցած է տարեկան 1,2 մլն տոննա ցեմենտ և 1 մլն տոննա կլինկեր նախագծային հզորությամբ երկու տեխնոլոգիական գծով: