Արցախի պահպանության կոմիտեն ՄԱԿ-ի ԱԽ-ին, ԵՄ-ին և ԵԱՀԿ-ին կոչ է արել պատժամիջոցներ սահմանել Ադրբեջանի դեմ՝ ԼՂՀ ղեկավարության նկատմամբ իրավական ֆարսի համար

Արմինֆո.  Արցախի պահպանության կոմիտե ՄԱԿ-ի Անվտանգության խորհրդին, ԵՄ-ին, ԵԱՀԿ-ին, ԱՄՆ-ին և Ռուսաստանին կոչ է արել թիրախային տնտեսական և վիզային պատժամիջոցներ սահմանել Ադրբեջանի պաշտոնատար անձանց նկատմամբ, որոնք պատասխանատու են Լեռնային Ղարաբաղի Հանրապետության (ԼՂՀ) ռազմաքաղաքական ղեկավարության նկատմամբ իրավական ֆարսի կազմակերպման համար:

Ինչպես ԱրմԻնֆո-ին հաղորդել են կոմիտեի մամուլի ծառայությունից, այդ կոչն արձագանք էր Արցախի նախկին պետնախարար, բարերար Ռուբեն Վարդանյանի դեմ Ադրբեջանի դատախազության կողմից նախապատրաստված 200 էջանոց մեղադրական եզրակացության հրապարակմանը: Հայտարարության մեջ ընդգծվում է, որ այդ մեղադրանքը ոչ միայն ուղղված է նրա դեմ, այլ իր իրավական ու փաստական աղճատումներով ընդլայնում է տարածաշրջանում արդեն օգտագործվող քաղաքական հետապնդումների գործիքակազմը և լեգիտիմացնում «պատանդների արդարադատությունը» որպես պետական քաղաքականություն։

«Նախորդ երեք տարիներին հայկական ինքնության դեմ իրականացված քաղաքական բռնությունները, Լաչինի միջանցքի արգելափակումը, հումանիտար ճգնաժամի ծրագրված սանձազերծումը և միջազգային դատարանների վճիռների բացահայտ արհամարհումը ցույց տվեցին, որ պաշտոնական Բաքուն պատրաստ է ոտնահարել անգամ ամենաբարձր մակարդակի միջազգային պարտավորությունները՝ ապահովելու իր ցանկալի ներհասարակական դասակարգավորումները։

Ռուբեն Վարդանյանի՝ փաստաթղթերով հաստատված բարձր հեղինակությունն ու մարդասիրական գործունեությունը դատախազությունը վերածել է, իբր, «ահաբեկչության ֆինանսավորման», իսկ Լեռնային Ղարաբաղի Հանրապետության գոյության փաստը՝ «հանցավոր կառույցի»։

Եթե այդ կեղծ «իրավական» շղթան չկոտրվի, վաղը նույն մեթոդաբանությունը կարող է կիրառվել ցանկացած ժողովրդի, լրագրողի, բժշկի կամ ուսուցչի նկատմամբ, որի գործունեությունը հակասում է ներկա իշխանությունների քաղաքական օրակարգին», - նածազգուշացնում է կոմիտեն։

Արցախի Պահպանության կոմիտեն հայտարարում է, որԼՂՀ-ն «հանցավոր կազմակերպություն» անվանելը միջազգային իրավունքի՝ ժողովուրդների ինքնորոշման սկզբունքի և ՄԱԿ-ի հիմնարար դրույթների բացահայտ խախտում է։ Վարդանյանին հետադարձ պատասխանատվության ենթարկելը կոպտորեն տապալում է nullum crimen sine lege (սկզբունք, որի համաձայն, չկա հանցագործություն՝ առանց օրենքում դրա մասին նշելու-խմբ.) և արդար դատավարության սկզբունքները։

Բացի այդ, ընդգծվում է, որ «սահմանն ապօրինի հատելու» մեղադրանքը անտեսում է 2020 թ. նոյեմբերի 9-ի եռակողմ հայտարարությունը, ինչպես նաև ՄԱԿ-ի և ՄԻԵԴ-ի՝ Լաչինի միջանցքով ազատ տեղաշարժի երաշխիքները՝ հաստատելով, որ ձերբակալությունը համարժեք է պատանդառության։

«Իսկ «Ավրորա» մարդասիրական նախաձեռնությունը «ահաբեկչության» հետ կապելու պնդումը ռևիզիա է միջազգային բարեգործական համակարգի նկատմամբ և վտանգում է համաշխարհային մարդասիրական նախաձեռնությունների անվտանգությունը», - հեվելել են կոմիտեում։

Այդ առնչությամբ Արցախի պահպանության կոմիտեն կոչ է անում ՄԱԿ-ի Անվտանգության խորհրդին, ԵՄ-ին, ԵԱՀԿ-ին, ԱՄՆ-ին եւ  ՌԴ-ին հրապարակային և մեկ միասնական պահանջ ներկայացնել Ռուբեն Վարդանյանի և մյուս հայ պատանդների անհապաղ ազատ արձակման վերաբերյալ։ Այնուհետեւ կոմիտեն կոչ է անում սահմանել թիրախային տնտեսական և վիզային պատժամիջոցներ Ադրբեջանի այն պաշտոնյաների նկատմամբ, որոնք պատասխանատու են այս իրավական ֆարսի կազմակերպման համար։ Բացի այդ, հնչում է պահանջ, որպեսզի ՄԱԿ-ի Մարդու իրավունքների գերագույն հանձնակատար, ԵԽԽՎ — անհապաղ մուտք գործեն Բաքու, փաստագրեն մարդու իրավունքների շարունակական խախտումները և զեկույց ներկայացնեն Անվտանգության խորհրդին։

«Եթե միջազգային հանրությունը հիմա չկանգնեցնի այս վտանգավոր նախադեպը, վաղը նույն մեխանիզմը կուրորեն կուլ կտա աշխարհի ցանկացած անկյունի անզեն բնակչությանը՝ առանց աչք թարթելու», - ասվում է հայտարարությունում։