"Երևանի կանաչապատում". քաղաքացիները դժգոհ են, բնապահպանները տագնապ են ազդարարում, քաղաքապետը հեգնում է ծառահատումների մասին, իսկ դրա համար պատասխանատուն ափսոսում է, որ հնարավոր չեղավ ամեն ինչ կտրել

Արմինֆո. Մինչ բնապահպանները տագնապ են ազդարարում Երևանում ծառահատումների առնչությամբ՝ ոչ միայն քաղաքի կենտրոնական փողոցներում, այլև այգիներում, անգամ, Բուսաբանական այգում, Երևանի քաղաքապետարանում հեգնում են տեղի ունեցածի մասին, վստահեցնելով, որ քաղաքը մաքրվում է հին, դեֆորմացված և հիվանդ ծառերից:

Երևանի քաղաքապետարանի հերթական աշխատանքային նիստում քաղաքապետ Տիգրան Ավինյանը հեգնել է, հարցնելով "Կանաչապատում և շրջակա միջավայրի պաշտպանություն" ՊՈԱԿ-ի ղեկավար Արմեն Բեգոյանին, թե արդյոք վերջինս իսկապես Երևանում ծառեր է կտրում և համատարած բացառապես սակուրաներ տնկում:

Բեգոյանը, առանց շփոթվելու, այդ առնչությամբ անդրադարձել է կառավարության շենքի մոտ՝ Մելիք Ադամյան փողոցում, ծառահատման վերջին աշխատանքներին: Նա ափսոսանքով նշել է, որ  բոլոր կնձնիները չի հաջողվել կտրել, ինչն ընդհանուր ուրախություն է առաջացրել քաղաքապետարանի նիստում: Ընդ որում, Բեգոյանը կրկին սկսել է պնդել, որ հատումները վերաբերել են բացառապես հիվանդ, դեֆորմացված և ծերացած ծառերին, որոնց վերաբերյալ բազմաթիվ բողոքներ են ստացվել: "Թող գան և տեսնեն, թե ինչ ծառեր են հատվում", - ասել է քաղաքի կանաչապատման ղեկավարը, դիմելով քաղաքացիներին և փորձագիտական հանրությանը, որը տեղի ունեցողը որակում է էկոցիդ:

Հիշեցնելով, որ հատվել է 59 կնձնի, և տնկվել է 82 գնդաձև կատալպա, նա ընդգծել է, որ այդ հատվածում 2 օրվա ընթացքում հաջողվել է տեղադրել ոռոգման նոր համակարգ: Ընդ որում, Բեգոյանը նշել է, որ այդ ծառերն ավելի բարձր կլինեն, քան Թումանյան փողոցում տնկվածները։ Նա նաև հավաստիացրեց, որ կատալպաները բավականաչափ ստվեր կստեղծեն, քանի որ դրանք 15 տարեկան ծառեր են:

Ընդհանուր առմամբ, ՊՈԱԿ - ի ղեկավարը հաղորդել է,  որ վերջին երկուսուկես տարվա ընթացքում Երեւանում կանաչապատման ծրագրի շրջանակում հայտնվել է 45.8 հա նոր կանաչ գոտի կամ 20 հազար ծառ, որից միայն մոտ 100-ը՝ սակուրա: Նրանց համար, ովքեր քաղաքում նոր կանաչ տարածքներ չեն տեսնում, Բեգոյանն առաջարկել է էքսկուրսիա կազմակերպել, այդ թվում ՝ լրատվամիջոցների ներկայացուցիչների մասնակցությամբ: Բացի այդ, նա նշել է, որ 45.8 հա կանաչ տարածքները ամբողջությամբ ծածկված են ոռոգման համակարգով, իսկ տնկիների գոյատևման մակարդակը կազմում է 94%:

Հիշեցնենք, որ 2023 թվականից Երևանի քաղաքապետարանը ծառերի փոխարինման ծրագիր է իրականացնում հատկապես քաղաքի կենտրոնում։ Իշխանությունները այս նախաձեռնությունը բացատրում են կենսունակության կորստի փուլում գտնվող ծառերը ավելի արժեքավոր ծառերով փոխարինելու անհրաժեշտությամբ: Իրականում, ըստ փորձագետների, քաղաքապետարանը էկոցիդ է կազմակերպել։ Մասնավորապես, 2024 թվականին քաղաքապետարանը Թումանյան փողոցում սկսել է առողջ ծառերի զանգվածային հատում՝ աշխատանքները շարունակելով 2025 թվականին և հատելով միանգամայն առողջ ծառեր ։ Օրեր առաջ սոցիալական ցանցերի հայկական հատվածը ողողվել է մայրաքաղաքի ծառահատումների սարսափելի կադրերով։ Բացի այդ, օրեր առաջ բլոգեր Էդուարդ Հայրումյանը հաղորդել էր Երևանի բուսաբանական այգում առողջ կաղնիների զանգվածային հատման մասին։ Նրա ասելով՝ վերջին մի քանի ամիսներին մոտ 30 կենսունակ կաղնի է հատվել։