Մասնավոր պահնորդական գործունեությունը Հայաստանում կենթարկվի օրենսդրական նոր կարգավորումների

Արմինֆո. Հայաստանում պահնորդական գործունեությունը կենթարկվի օրենսդրական նոր կարգավորումների։ ՀՀ Ազգային ժողովի պաշտպանության եւ անվտանգության հարցերի հանձնաժողովը մարտի 20-ի նիստում դրական եզրակացություն է տվել "Մասնավոր պահնորդական գործունեության մասին" օրենքում եւ հարակից օրենքների փաթեթում առաջին ընթերցմամբ ՀՀ կառավարության ներկայացրած փոփոխություններին:

Ինչպես նշել է ՀՀ ներքին գործերի նախարարի տեղակալ Արմեն Մկրտչյանը, նախաձեռնության նպատակը մասնավոր պահնորդական գործունեության լավարկումն ու կանոնակարգումն է: Դրանք բաժանվել են 3 ուղղությունների: «Առաջինը վերաբերում է օրենսդրության որոշակիացմանն ու ստանդարտացմանը, եւ այս առումով նշեմ, որ օրենքը լրացնում ենք փաստացի մատուցվող բոլոր ենթատեսակներով. ահազանգման, տեսահսկման համակարգեր, որոնք օգտագործվում էին, սակայն օրենսդրական ամրագրում չունեին», - ասել է նա:

Նրա խոսքով նաեւ առաջարկվում է, որ լիցենզիա ստանալու համար  հայտ ներկայացնելիս կազմակերպությունը պետք է ունենա առնվազն 10 որակավորված պահնորդ՝ ներկայիս 1-ի փոխարեն:

«Նախատեսում ենք նաեւ, որ գործունեության այս տեսակը պետք է ունենա պարտադիր ապահովագրական պահանջ, որը պետք է նախորդ տարվա ընթացքում մատուցված ծառայությունների համար գանձված  վճարների կրկնակի չափը ունենա, բայց ոչ պակաս, քան 10 մլն դրամը»,-ասել է փոխնախարարը՝ հավելելով, որ եթե պահնորդական կազմակերպության գործունեության սխալի հետեւանքով պահպանվող օբյեկտը վնաս կրի կամ տուժի որեւէ կերպ, ապա ապահովագրական գործակալությունը համապատասխան գումարի չափով պետք է հատուցի այդ վնասները:

ԱԺ հաղորդագրության համաձայն, առաջարկվում են նաեւ այլ կարգավորումներ: Ակնկալվում է, որ նախագծերով առաջարկվող փոփոխություններն ու  լրացումները դրական ազդեցություն կունենան ոլորտի մրցակցային միջավայրի բարելավման, մասնավոր պահնորդական գործունեություն իրականացնող կազմակերպությունների արդյունավետ վերահսկման, պահնորդական կամ թիկնապահական գործունեության արդյունավետության բարձրացման վրա:

Այս կարգավորումներից բացի, առաջարկվում է մասնավոր պահնորդական գործունեության լիցենզիա ստանալու համար պետական տուրքի դրույքաչափը՝ բազային տուրքը, որը շուրջ 13 տարի չի փոփոխվել, եւ կազմակերպության գործունեության ամբողջ ժամանակահատվածի համար վճարվում է մեկ անգամ, 500-ապատիկի փոխարեն սահմանել 3000-ապատիկի չափով: Այս փոփոխությամբ ակնկալվում է, որ մասնավոր  պահնորդական գործունեություն իրականացնելու լիցենզիա ստանալու համար կդիմեն եւ լիցենզիա կստանան միայն այն կազմակերպությունները, որոնք հստակ նպատակադրված են գործունեություն ծավալելու նշված ոլորտում եւ տիրապետում են անհրաժեշտ ֆինանսական, կադրային, սպառազինային ռեսուրսների:

Նաեւ առաջարկվում է հատուկ կանոնադրական խնդիրներ իրականացնող իրավաբանական անձանց աշխատողների՝ զենք կրելու թույլտվությունը նախատեսել որպես ֆիզիկական անձանց թույլտվության տեսակ, որը հնարավորություն կտա պահնորդին կամ թիկնապահին ունենալ զենք կրելու 5 տարվա թույլտվություն՝ անկախ գործատուի փոփոխությունից:

Զեկուցողը տեղեկացրել է, որ այժմ գրանցված է լիցենզավորված շուրջ 200 պահնորդական կազմակերպություն, թեեւ դրանցից 20-30 են, որոնք մշտապես կայուն եւ որակյալ ծառայություններ են մատուցում:

Մտքերի փոխանակության ընթացքում պատգամավորները բարձրաձայնել են մի շարք հարցեր, որոնք խնդրահարույց են համարել: Ներկայացվել են նաեւ առաջարկներ, որոնք կքննարկվեն մինչեւ երկրորդ ընթերցում: