Գավառի մանկատան սաները հաղթահարեցին Արմաղան լեռան գագաթը

 Գավառի մանկատան սաները և ուսուցիչները,  մարզի համայնքների անապահով ընտանիքների մի խումբ երեխաներ, ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԻ և «Վորլդ Վիժն Հայաստան» միջազգային բարեգործական կազմակերպության աշխատակիցների հետ միասին սեպտեմբերի 11-ին  վերելք կատարեցին դեպի Գեղամա լեռնաշղթայի՝ Արմաղան լեռան գագաթը:

Ինչպես ԱրմԻնֆո գործակալությանը տեղեկացվել է Բանկի մամուլի ծառայությունից, արշավը կազմակերպվել էր ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԻ,  «Հայաստան» Համահայկական հիմնադրամի և Վորլդ Վիժն Հայաստանի համատեղ բարեգործական ծրագրի շրջանակներում, որի  նպատակն է Գավառի մանկատան սաների համար ստեղծել ընդլայնված կրթական հնարավորություններ, ինչպես նաև նպաստել նրանց սոցիալական ինտեգրմանը:

Հաղթահարելով ավելի քան 2800 մ բարձրություն` արշավի մասնակիցները այցելեցին լեռնագագաթին գտնվող խառնարանային լիճը և հին սրբավայրի տեղում կառուցված մատուռը, ինչպես նաև մասնակցեցին Հայաստանի անկախության տարեդարձին  նվիրված քննարկմանը: «Վորլդ Վիժն»-ի Գավառի գրասենյակի աշխատակիցները նրանց համար կազմակերպեցին  ազգային խաղեր և  այլ զվարճանքներ:  Ընդհանուր թվով ավելի քան 40 երեխա և մոտ 25 մեծահասակ մասնակցեց միջոցառմանը:

Նման միջոցառումները մանկատան սաներին հնարավորություն են տալիս հաստատությունից  դուրս  կապեր հաստատել իրենց հասակակիցների հետ և  ձեռքբերել նոր ընկերներ, ինչը նպաստում է այդ երեխաների մոտ հաղորդակցման հմտությունների ձևավորմանը և հասարակության մեջ նրանց ինտեգրմանը:

Գավառի մանկատանն իրականացվող  եռակողմ համատեղ ծրագիրը  սկսվել է 2014 թ. հոկտեմբերին:  Ծրագրի շրջանակներում Գավառ քաղաքի մանկատանը ստեղծվել է  կրթական կենտրոն, որտեղ  9-18 տարեկան մոտ 80 երեխա՝ մանկատան սաներից և մարզի անապահով ընտանիքներից, մասնակցում է  հայոց և օտար լեզուների, մաթեմատիկայի,  պատմության խորացված ուսուցման դասերի, ինչպես նաև  տարբեր մասնագիտական դասընթացների: Ծրագրի՝ մոտ 41 000 000 ՀՀ դրամ ֆինանսավորումն իրականացվում է ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԻ և «Հայաստան» Համահայկական Հիմնադրամի կողմից թողարկած Visa ԲԱՐԵՐԱՐ բարեգործական քարտի միջոցով:  Ծրագիրն իրականացնում է «Վորլդ Վիժն Հայաստան» միջազգային բարեգործական կազմակերպությունը:

 Այս ծրագիրը ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԻ, «Հայաստան» Համահայկական հիմնադրամի և «Վորլդ Վիժն Հայաստան»-ի առաջին համատեղ բարեգործական նախաձեռնությունն է: 

Նշենք, որ ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԸ, «Հայաստան» Համահայկական Հիմնադրամը և Visa ընկերությունը 2012 թվականի վերջին հայտարարեցին Visa ԲԱՐԵՐԱՐ բարեգործական քարտի թողարկման մասին, որը նվիրված էր «Հայաստան» Համահայկական Հիմնադրամի ստեղծման 20-ամյա հոբելյանին: Նախագծի նպատակը Հայաստանի մանկատների երեխաներին օգնելու նպատակով միջոցների հայթայթումն էր: Դառնալով Visa ԲԱՐԵՐԱՐ քարտի քարտապան, ցանկացողները կարող են առանց լրացուցիչ ծախսերի «Հայաստան» Համահայկական Հիմնադրամի օգտին իրականացնել պարբերական բարեգործական վճարներ: Դրա համար անհրաժեշտ է քարտով կատարել ամենօրյա վճարումներ: Հիմնադրամի օգտին է փոխանցվում յուրաքանչյուր վճարման 0.3%-ը, ինչպես նաև քարտի տարեկան սպասարկման վճարի 50%-ը: Բացի այդ, Visa ԲԱՐԵՐԱՐ քարտապանները կարող են իրականացնել նաև լրացուցիչ վճարներ, նախագծին ավելի շատ անձանց ներգրավելու համար, քանի որ Visa ԲԱՐԵՐԱՐ աշխատավարձային քարտերն աշխատավարձային նախագծի գործողության ընթացքում բանկի կողմից սպասարկվում են անվճար:

Նշենք, որ «ԱԿԲԱ ԿՐԵԴԻՏ ԱԳՐԻԿՈԼ ԲԱՆԿԸ» Հայաստանում գործում է 1995 թվականից, սկզբում որպես Գյուղացիական փոխօգնության կոոպերատիվ բանկ: 2006 թվականից բանկի մեծամասանական բաժնետերը դարձավ  եվրոպական խոշորագույն բանկային` Credit Agricole S.A. խումբը, 15.56% բաժնեմասով, որին հաջորդում է «Sacam International» բաժնետիրական ընկերությունը (Credit Agricole S.A. խմբի անդամ) - 12,44%: Բացի այդ, բանկի կապիտալին մասնակցում են նաև Գյուղացիական փոխօգնության 10 մարզային միություններ: Մասնաճյուղերի, ինչպես նաև մարզային մասնաճյուղերի, ցանցով բանկը երկրորդն է հանրապետությունում – 56 մասնաճյուղ, որոնց մեծ մասը գտնվում է մարզերում (41 մասնաճյուղ), իր ներկայությունն ապահովելով Հայաստանի բոլոր մարզերում: ԱԿԲԱ-Կրեդիտ Ագրիկոլ Բանկը հիմնական հաշվեկշռային ցուցանիշներով 2014 թ-ին իր դիրքերն ամրապնդել է լավագույնների հնգյակում: «Հայաստան» համահայկական հիմնադրամը շահույթ չհետապնդող կազմակերպություն է, որը հիմնադրվել է 1992թ-ին և կոչված է խթանելու մարդասիրական օգնությունը և ենթակառուցվածքների զարգացումը ՀՀ-ում և ԼՂՀ-ում: Հիմնադրամն ունի 25 տեղական մարմին ամբողջ աշխարհում: «Վորլդ Վիժն» միջազգային բարեգործական կազմակերպության կոչումն է բարեփոխել աղքատության մեջ ապրող երեխաների, նրանց ընտանիքների և համայնքների կյանքը: Այն Հայստանում սկսել է գործել 1988 թվականից, առաջին նախագծերն ուղղելով Սպիտակի երկրաշարժից տուժածների օգնությանը: ներկայումս աշխատում է Շիրակի, Արագածոտնի, Գեղարքունիքի, Սյունիքի, Տավուշի և Լոռու մարզերի և մայրաքաղաք Երևանի ավելի քան 250 համայնքներում` իրականացնելով զարգացման երկարաժամկետ ծրագրեր և օժանդակելով ավելի քան 32 000 երեխաների և նրանց ընտանիքներին: