Ռուբեն Վարդանյանի որդի. Չնայած Բաքվում խոշտանգումներին և սպառնալիքներին՝ Արցախի ժողովրդի իրավունքների հարցը շատ կարևոր է հորս համար

Արմինֆո. Չնայած Բաքվում խոշտանգումներին և բոլոր անձնական սպառնալիքներին՝ Արցախի ժողովրդի իրավունքների հարցը շարունակում է կարևոր լինել հորս համար։ Այդ մասին հայտարարել է Լեռնային Ղարաբաղի նախկին պետնախարար, բարերար Ռուբեն Վարդանյանի որդին՝ Դավիթ Վարդանյանը՝ Ֆրանսիայում գործող հայկական AYPFM ռադիոկայանին  հարցազրույցում։

"Չնայած Բաքվում խոշտանգումներին և իր հասցեին բոլոր անձնական սպառնալիքներին՝ նա մեզ ասել է, որ Արցախի ժողովրդի իրավունքների հարցն իր համար չափազանց կարևոր է։ Նա մարտական է տրամադրված, անսասան է։ Նա ասում է, որ չնայած բոլոր վտանգներին, ուզում է ճշմարտությունն ասել ։ Դատավարության առաջին օրը՝ հունվարի 17 - ին, նա նաև խնդրել է Ադրբեջանի դատարանին մեկ րոպե լռությամբ հարգել հակամարտության բոլոր զոհերի հիշատակը ՝ անկախ նրանց ազգությունից: Չնայած իրավիճակին, չնայած բոլոր անարդարություններին, որոնց բախվում են ինչպես ինքը, այնպես էլ մյուս հայերը, հայրս ուզում է ասել, որ մեր միակ ընտրությունը խաղաղ ապրելն է՝ առանց պատերազմի, բանակցել և հասկանալ միմյանց", - նշել է բարերարի որդին։

Հարցին, թե ինչ կարելի է ակնկալել Ռուբեն Վարդանյանի դատավարությունից, բարերարի որդին հիշեցրել է, որ շատ կազմակերպություններ, ինչպիսիք են Freedom House-ը, «Բժիշկներ առանց սահմանների», Ադրբեջանն անվանել են աշխարհի ամենաանազատ երկրներից մեկը, ուստի մեծ ակնկալիքներ չկան այդ "դատավարություններից":

"Օրինակ, անցյալ շաբաթ հայրս փաստաթղթեր է ստացել ադրբեջաներեն լեզվով, և նա ընդամենը երեք շաբաթ է ունեցել ավելի քան 20,000 էջից բաղկացած գործին ծանոթանալու համար՝ Ադրբեջանի կառավարության կողմից տրամադրված թարգմանչի միջոցով։ Ես չգիտեմ, թե ինչ է կատարվում մյուսների հետ, բայց հայտնի է, որ հորս գործը առանձին է քննվում։ Սակայն ես կարծում եմ, որ մյուսների դեպքում իրավիճակը նույնն է։ Ադրբեջանը ազատ երկիր չէ, նույնիսկ, իր քաղաքացիների համար, առավել ևս՝ հայերի համար չի կարող այդպիսին լինել", - նշել է Դավիթը։

Հարցին, թե ինչ կարելի է ակնկալել, մասնավորապես, Ֆրանսիայից կամ Եվրոպայից, որպեսզի հասնենք այդ ռազմագերիների ազատ արձակմանը, Վարդանյանի որդին պատասխանել է, որ այդ "դատավարությունը" սովորական, բաց դատավարություն չէ, քանի որ Ադրբեջանում, պարզապես, արդարադատության համակարգ գոյություն չունի: Նրա խոսքով ՝ հենց այդ պատճառով հայ ռազմագերիների միակ պաշտպանությունը կարող է լինել միջազգային հանրության արձագանքը և ժողովրդավարական երկրների կառավարությունների գործողությունները:

"Օրինակ,  հայրս ինձ ասաց, որ իր փաստաբանը հնարավորություն չունի պատշաճ կերպով նախապատրաստել պաշտպանությունը։ Ահա թե ինչու Ադրբեջանից պետք է պահանջել, որ եթե այդ դատը հայտարարված է բաց, ապա ֆրանսիացի, անգլիացի և ամերիկացի լրագրողները պետք է հնարավորություն ունենան մեկնել Ադրբեջան, ներկա գտնվել այդ նիստերին և լսել, թե իրականում ինչ է կատարվում այնտեղ ։ Քանի որ, չնայած հայտարարված "բաց դատավարությանը", դրան ներկա են միայն պետական ադրբեջանական լրատվամիջոցները", - կարծում է Դավիթը։

Ընդ որում, նրա խոսքով, երկրորդ կարեւոր քայլը կարող է լինել Ֆրանսիայի կառավարությանն ուղղված կոչը՝ ավելի շատ խոսել Ադրբեջանի այդ անարդարության մասին եւ ճնշում գործադրել Եվրամիության նկատմամբ, որպեսզի նրանք դադարեցնեն Ադրբեջանի հետ բոլոր գործարքները: "Սա միայն Հայաստանի և Ադրբեջանի միջև հարց չէ, սա նաև սեփական քաղաքացիների նկատմամբ Ադրբեջանի վերաբերմունքի հարց է։ Ադրբեջանում այժմ ավելի քան 300 քաղբանտարկյալ կա, և եթե թույլատրվում է, որ Ադրբեջանը նման կերպ վարվի հայ ռազմագերիների հետ, ես վստահ եմ, որ այդ երկիրն էլ ավելին կանի Հայաստանի դեմ, իր քաղաքացիների դեմ, ֆրանսիացի և եվրոպացի զբոսաշրջիկների դեմ", - նշել է նա։

Ճշտմանը, թե արդյոք Վարդանյանի ընտանիքը ինչ-որ բան ակնկալում է ԱՄՆ նոր նախագահ Դոնալդ Թրամփից, Դավիթը նշել է, որ հայ ժողովուրդը մեծ ակնկալիքներ ուներ ԱՄՆ նախկին նախագահից՝ Հայոց ցեղասպանության հետ կապված:

"Նա հայերին շատ բան խոստացավ, բայց շատ բան չարեց։ Դրանք միայն խոսքեր էին, որոնց չհաջորդեց ոչ մի գործողություն: Այժմ մենք հույսեր ունենք՝ կապված ԱՄՆ նոր նախագահի վարչակազմի հետ։ Դոնալդ Թրամփը գրել է, որ պաշտպանելու է Լեռնային Ղարաբաղում քրիստոնյաների իրավունքները, եւ մենք տեսանք, որ Հայաստանի եւ հայ ժողովրդի բարեկամներից ոմանք դարձել են նոր վարչակազմի մաս: Ես գիտեմ, որ մարդու իրավունքների հարցերը, քրիստոնյաների իրավունքների հարցը շատ կարևոր է նրանց համար, այդ իսկ պատճառով մենք լիահույս ենք, որ այս վարչակազմը և նախագահ Թրամփը կկարողանան այդ հարցերում օգնել հայ ռազմագերիներին", - նշել է բարերարի որդին։

Վերջում նա ընդգծել է, որ իր ընտանիքը շարունակելու է աշխատել, որպեսզի Ադրբեջանի կառավարությունը հարգի հայերի իրավունքները, ընդունելով, որ առանց միջազգային քաղաքական աջակցության նման քայլերը չեն կարող արդյունավետ լինել: -