ՀՀ խորհրդարանում իրավիճակը թեժ է. ընդդիմադիր պատգամավորները պահանջում են ընդհատել նիստը և քննարկել հանրապետությունում լարված իրավիճակը

 ՀՀ Ազգային ժողովի արտահերթ նիստն սկսվել է բուռն բանավեճերով երեկ ուշ երեկոյան և այսօր վաղ առավոտյան Երևանի կենտրոնում տեղի ունեցած իրադարձությունների շուրջ, երբ Ոստիկանությունը ուժ է գործադրել էլեկտրաէներգիայի սակագների բարձրացման դեմ բողոքի ակցիայի մասնակիցների նկատմամբ:

Խորհրդարանական ընդդիմության ներկայացուցիչները մեկը մյուսի հետևից մեղադրել են իշխանություններին ստեղծված լարված իրավիճակի համար: Հանրապետական կուսակցության պատգամավորները պասսիվություն  են ցուցաբերել, լռել են, և միայն ԱԺ նախագահ Գալուստ Սահակյանը, փորձելով արդարանալ, առաջարկել է շարունակել խորհրդարանի նիստը, իսկ պատգամավորներին հուզող հարցերը քննարկել ընդմիջման ժամանակ`իր մոտ հատուկ խորհրդակցության ընթացքում: 

ՀԱԿ խմբակցության քարտուղար Արամ Մանուկյանը, մասնավորապես, կոչ է արել անհապաղ ազատ արձակել էլեկտրաէներգիայի սակագների բարձրացման դեմ բողոքի ակցիայի ընթացքում բոլոր ձերբակալվածներին, ինչպես նաև պատժել ՙՈստիկանության ապօրինի գործողությունների համար՚ բոլոր պատասխանատուներին: Ի նշան բողոքի`ՀԱԿ խմբակցությունը լքել է խորհրդարանի նիստերի դահլիճը: 

Ընդդիմադիր պատգամավոր Նիկոլ Փաշինյանը պահանջել է, որ իր հայտարարությունն ընդունվի որպես հանցագործության մասին հաղորդում, քանի որ իրենց օրինական մասնագիտական պարտականությունները կատարող լրագրողների նկատմամբ ապօրինի գործողություններ են իրականացվել:

Ընդդիմադիր պատգամավոր Տիգրան Ուրիխանյանը հայտարարել է, որ խորհրդարանը չի կարող շարունակել իր աշխատանքը`պայմաններում, երբ տասնյակ անմեղ քաղաքացիներ ապօրինաբար պահվում են ոստիկանական բաժիններում:
ՙԺառանգություն՚ կուսակցությունից պատգամավոր Զարուհի Փոստանջյանը հայտարարել է, որ խորհրդարանը թմրամոլների և խաղամոլների ակումբ չէ, այն օրենսդրական բարձրագույն մարմին է, որը պարտավոր է արձագանքել հանրապետությունում տեղի ունեցող անօրինականությանը: Սակայն, ԱԺ նախագահ Գալուստ Սահակյանն ընդհատել է Փոստանջյանին: Պատգամավորը, սակայն, չի հանձնվել. չնայած անջատված խոսափողին`շարունակել է իր ելույթը:  
ՙԺառանգություն՚ կուսակցությունից պատգամավոր Թևան Պողոսյանն առաջարկել է ընդհատել խորհրդարանի նիստը և շտապ կարգով քննարկել երկրում ստեղծված իրավիճակը: ՙՕրինաց երկիր՚ կուսակցությունից պատգամավոր Հովհաննես Մարգարյանն առաջարկել է ԱԺ արտահերթ նիստ անցկացնել`ճգնաժամից ելքի ուղիները քննարկելու նպատակով: 
Իսկ ՕԵԿ խմբակցության ղեկավար Հեղինե Բիշարյանը հայտարարել է, որ խորհրդարանի արտահերթ նիստ անհրաժեշտ է անցկացնել`էլեկտրաէներգիայի սակագների բարձրացման վերաբերյալ որոշումը չեղյալ հայտարարելու համար, քանի որ միայն այդ դեպքում հնարավոր է հաղթահարել ներքաղաքական ճգնաժամը երկրում:
ՙԲարգավաճ Հայաստան՚ կուսակցությունից պատգամավոր Վահե Էնֆիաջյանը նույնպես դատապարտել է Ոստիկանության կողմից ակցիայի մասնակիցների և լրագրողների նկատմամբ բռնությունը:
Ի պատասխան`խորհրդարանի նախագահ Գալուստ Սահակյանը հայտարարել է, որ ստեղծված իրավիճակը մտահոգում է բոլորին: Այդ առնչությամբ նա առաջարկել է ընդմիջման ժամանակ խորհրդակցություն հրավիրել իր կաբինետում`խորհրդարանական բոլոր ուժերի մասնակցությամբ և քննարկել ստեղծված իրավիճակը ու դրանից ելքերը:

ԱԺ փոխնախագահ Էդուարդ Շարմազանովը հայտարարել է, որ խորհրդարանը  երդվյալ ատենակալների դատարան չէ`ինչ-որ մեկին դատելու համար: ՙՁեր հայտարարություններից տպավորություն է ստեղծվում, որ նախօրեին և այսօր առավոտյան կոտորած է տեղի ունեցել: Դա ամենևին այդպես չէ, քանի որ մինչև ուժ գործադրելը Ոստիկանությունը երկար ժամանակ համոզել է ակցիայի մասնակիցներին դադարեցնել այն: Սակայն, դա տեղի չի ունեցել: Ոստիկանությունը հասարակական կարգն ապահովելու համար է, և օրենքի խախտման դեպքում ուժ գործադրվում է բոլոր `նույնիսկ ամենաժողովրդավար երկրներում՚,- հայտարարել է Շարմազանովը`ափսոսանք հայտնելով այն առնչությամբ, որ ակցիայի մասնակիցները չեն արձագանքել նախագահի`3-4 մարդուց պատվիրակություն կազմելու և իր հետ հանդիպելու առաջարկին: ՙԵթե նրանք հանդիպեին նախագահի հետ, գործընթացներն այլ ընթացք կստանային: Եվ պետք չէ այստեղ շոու սարքել՚,- ասել է Շարմազանովը: 

Առավոտյան 5:30-ին Ոստիկանությունը, օգտագործելով հատուկ տեխնիկա, մասնավորապես`ջրցան մեքենաներ, ցրել է Երևանում`նախագահական նստավայրի մոտ, անցկացվող նստացույցը: Ակցիայի մասնակիցները`շուրջ 500 մարդ, փախել են դեպի Ազատության հրապարակ, սակայն ճանապարհին նրանց դիմավորել են Ոստիկանության աշխատակիցները և կոշտ ուժ գործադրելով`ցուցարարներին բերման ենթարկել ոստիկանական տարբեր բաժանմունքներ:Բերման ենթարկվածների թվում եղել են նաև լրագրողներ: Նրանց տեխնիկան ամբողջովին ոչնչացվել է: Լրագրողները, ոստիկանական բաժանմունքներից կապվելով իրենց խմբագրությունների հետ, հայտնել են, որ իրենց նկատմամբ ուժ են գործադրել, դաժան ծեծի ենթարկել: Կան նույնիսկ վիրավորներ, ովքեր տեղափոխվել են բուժհաստատություններ: Ընդհանուր առմամբ, տարբեր տվյալներով, բերման է ենթարկվել 237 մարդ: Նրանց մի մասն արդեն ազատ է արձակվել:

Նշենք, որ ակցիայի մասնակիցները բողոքել են էլեկտրաէներգիայի սակագների 7 դրամով բարձրացման դեմ`պահանջելով իշխանություններից չեղյալ հայտարարել այդ որոշումը և վերանայել նախկին սակագները: