Ռուս դիվանագետ. Լեռնային Ղարաբաղի հարցը փակված է

Արմինֆո. Լեռնային Ղարաբաղի հարցը փակված է։ Այդ մասին հայտարարել է Ադրբեջանում Ռուսաստանի դեսպան Միխայիլ Եվդոկիմովը՝ "Իզվեստիա" թերթի հարցազրույցում։ Նրա խոսքով՝ այս տարիների ընթացքում Ռուսաստանը ջանքեր է գործադրել Լեռնային Ղարաբաղի խնդիրը խաղաղ ճանապարհով լուծելու համար:

"Ցավոք, չստացվեց. այդ թեման փակվեց սեպտեմբերին ուժային գործողությամբ։ Ռուսաստանը միշտ շատ կարևոր դեր է խաղում կարգավորման գործում։ Ռուսաստանը պատրաստ է առավելագույն աջակցություն ցուցաբերել երկու կողմերի միջև խաղաղության պայմանագրի շուրջ բանակցություններում։ Այժմ Հայաստանն ու Ադրբեջանն ուղղակիորեն փոխանակում են խաղաղության պայմանագրի նախագծերը։ Այն, ինչ առաջարկում է ադրբեջանական կողմը, իմ կարծիքով, միանգամայն արդարացված, ստանդարտ ձեւակերպումներ եւ հոդվածներ են, որոնք, որպես կանոն, գոյություն ունեն կողմերի միջեւ խաղաղության պայմանագրերում: Եվ, սկզբունքորեն, այն առաջարկների հիման վրա, որոնք անում է Բաքուն, ինձ թվում է, որ կարելի է բավական արագ ավարտել այդ բանակցությունները ։ Մենք պատրաստ ենք տրամադրել մոսկովյան հարթակը, մենք պատրաստ ենք անհրաժեշտության դեպքում տրամադրել մեր փորձաքննությունը, տեքստի վերաբերյալ մեր խորհուրդները ։ Այստեղ մենք ադրբեջանցի գործընկերների հետ շատ լավ փոխգործակցություն ունենք", - նշել է Ռուսաստանի դեսպանը։

Անդրադառնալով հարցին՝ թե արդյոք այս տարի կստորագրվի պայմանագիրը, Եվդոկիմովը հավաստիացրել է, որ Ադրբեջանը տրամադրված է շատ արագ ավարտին հասցնել խաղաղության պայմանագրի ստորագրման շուրջ բանակցությունները: "Բայց, ինչպես հայտնի է, բանակցություններն ավարտելու համար նման ցանկություն պետք է ունենան երկու կողմերը", - հայտարարել է նա:

Անդրադառնալով Ադրբեջանի հիմնական հատվածից դեպի իր էքսկլավ Նախիջևան "տրանսպորտային միջանցքի" մասին հարցին՝ Եվդոկիմովը նշել է այդ թեմայի կարևորությունն Ադրբեջանի համար։ Նրա խոսքով ՝ դա կայուն տրանսպորտային երթուղու, Ադրբեջանի հիմնական տարածքի և Նախիջևանի միջև տրանսպորտային ուղիների առկայությունն է։ "Ղարաբաղյան առաջին պատերազմի ժամանակ ընդհատվել են բոլոր հաղորդակցությունները, անջատվել է ԷլեկտրաԷներգիայի մատակարարումը Նախիջևան։ Ուստի Ադրբեջանի համար երթուղու անվտանգությունը (դա մոտավորապես 46 կմ է) վերացական թեմա չէ։ Այս երթուղու վրա կան նաև թունելներ, այնտեղ, իմ կարծիքով, կա նաև կամուրջ։ Ռուսաստանի Դաշնությունը պատրաստ էր բավականին արագ վերականգնել այս երթուղին իր փողերով։ Տարբեր, ինձ համար ոչ այնքան հասկանալի պատճառներով հայկական կողմը ձգձգում է բանակցությունները", - հավաստիացրել է ռուս դիվանագետը։

Ընդ որում, նա հավելել է, թե, որպես արդյունք, անցյալ տարի Բաքուն և Թեհրանը համաձայնագիր են ստորագրել Իրանի տարածքով երկաթուղային ճանապարհի կառուցման մասին: "Այնտեղ մի քիչ ավելի շատ է՝ մոտ 60 կմ, երթուղին ավելի բարդ է, բայց այդ աշխատանքներն արդեն ընթանում են։ Այս բոլոր տարիներին Ադրբեջանի և Նախիջևանի միջև բեռնատար ավտոմոբիլային տրանսպորտն անցնում էր Իրանի տարածքով ։

Գումարած՝ դա նույն երթուղին է դեպի Թուրքիա: Այժմ գլխավորը Թուրքիայից Նախիջևան երկաթուղային գծեր կառուցելն է, նախատեսվում է երկուսը՝ եվրոպական և սովետական: Համապատասխանաբար, մենք հնարավորություն կունենանք Ռուսաստանից Թուրքիա բեռներ փոխադրել Ադրբեջանի, Իրանի և Նախիջևանի տարածքով", - հավելել է նա։