Բլինքենն Ալիեւին կոչ է արել լայն համաներում հայտարարել եւ թույլատրել միջազգային դիտորդների առաքելություն Լեռնային Ղարաբաղում

Արմինֆո.ԱՄՆ պետքարտուղար Էնթոնի Բլինքենը հեռախոսազրույց է ունեցել Ադրբեջանի նախագահ Իլհամ Ալիևի հետ:

Ինչպես հաղորդում է ԱՄՆ Պետքդեպարտաամենտի մամուլի ծառայությունը, զրույցի նպատակն է ընդգծել, որ Ադրբեջանը պետք է զերծ մնա Լեռնային Ղարաբաղում հետագա ռազմական գործողություններից և անարգել հումանիտար հասանելիություն ապահովի: "Նա նախագահ Ալիեւին կոչ է արել Լեռնային Ղարաբաղի բնակիչներին երաշխիքներ տալ, որ նրանք կարող են ապահով ապրել իրենց տներում, եւ որ նրանց իրավունքները պաշտպանված կլինեն։ Պետքարտուղարը կոչ է արել նախագահ Ալիեւին լայն համաներում հայտարարել եւ թույլատրել միջազգային դիտորդների առաքելություն Լեռնային Ղարաբաղում, ինչպես նաեւ նշել է նախագահի հրապարակային պարտավորությունները ՝ օգնելու կառուցել ապագա Լեռնային Ղարաբաղի բոլոր բնակիչների համար ՝ հիմնված խաղաղության, փոխըմբռնման եւ փոխադարձ հարգանքի վրա", - ասվում է գերատեսչության հաղորդագրության մեջ:

Իր հերթին՝ Ալիևի մամուլի ծառայությունը ևս հաստատել է Բլինքենի հետ զրույցի փաստը: "Ընդգծվել է ադրբեջանական կողմի պատրաստակամությունը առաջիկայում կազմակերպել երկրում հավատարմագրված ՄԱԿ-ի ռեզիդենտ համակարգողի այցը Ղարաբաղ", - հայտնել Է նախագահի մամուլի ծառայությունը:

Ալիևն ընդգծել է, որ աշխատանքներ են տարվում "Ղարաբաղի հայ բնակչության իրավունքների ապահովման ուղղությամբ ՝ ադրբեջանական օրենսդրությանը և երկրի միջազգային պարտավորություններին համապատասխան":

Նշենք, որ սեպտեմբերի 19-ին Ադրբեջանը "հակաահաբեկչական գործողության" պատրվակով հերթական ագրեսիան ձեռնարկեց Արցախի նկատմամբ: Թշնամական ագրեսիայի հետևանքով հարյուրավոր արցախցիներ վիրավորվել են, հաղորդվում է ավելի քան 200 զոհի մասին, այդ թվում ՝ խաղաղ բնակիչների շրջանում: Սեպտեմբերի 20-ին Արցախն ընկավ։ Ադրբեջանն սկսել է Արցախի բռնի հպատակեցումը:

Սեպտեմբերի 21-ին Եվլախում կայացել է Բաքվի և Ստեփանակերտի ներկայացուցիչների հանդիպումը: Ադրբեջանը պահանջել է Արցախի Պաշտպանության բանակի զինաթափում, բոլոր զինծառայողների գերեվարում և  բոլոր պետական կառույցների վերացում: Սեպտեմբերի 22-ին մեկնարկել է Արցախի Պաշտպանության բանակի լուծարման գործընթացը: Միջազգային հանրությունը մատների արանքով է նայում Արցախում Ադրբեջանի վայրագություններին։ Տեղեկություններ են ստացվում, որ թշնամական կողմը ոչնչացրել է սեպտեմբերի 19-20-ը գրավված գյուղերի բնակչությանը ։ Սեպտեմբերի 21-24-ը որոնողական աշխատանքների ընթացքում ԼՂՀ ՆԳՆ-ն հայտնաբերել է 105 արցախցու, այդ թվում ՝ դաժանաբար սպանված երեխաների և ծերերի մարմիններ:

Սեպտեմբերի 26-ի երեկոյան դրությամբ արդեն շուրջ 30 հազար բռնի տեղահանված արցախցիներ ժամանել են Հայաստան ։ Սեպտեմբերի 25-ի երեկոյան հայտնի դարձավ նաև, որ Արցախը միացրել են Ադրբեջանի էներգահամակարգին ։ Երևանում և մարզերում չեն դադարում ՀՀ վարչապետի հրաժարականի պահանջով բողոքի ակցիաները ։

Հավելենք նաև, որ սեպտեմբերի 25-ին Ստեփանակերտի մոտակայքում տեղի է ունեցել պայթյուն վառելիքով լի պահեստում, պայթել է բենզինի ցիստեռն: Դեպքի վայրում եղել են Ադրբեջանական վերջին ագրեսիայի ֆոնին Արցախից հեռանալու համար բենզինի հերթ կանգնած մեծ թվով մարդիկ: Նախնական տվյալներով տուժել է ավելի քան 290 մարդ, ևս 68-ը զոհվել են, կան անհետ կորածներ: Տուժածներին օգնելու համար մոբիլիզացվել են Արցախի բուժանձնակազմի և ռուսական խաղաղապահ զորակազմի բոլոր ուժերը ։ Սանավիացիայով և շտապօգնության մեքենաներով մի քանի տասնյակ տուժածներին տեղափոխել են Երևան:

ԵՄ-ն հայտարարել է, որ լրացուցիչ 5 մլն եվրո կհատկացնի Արցախից տեղահանվածներին աջակցելու համար ։ Իր հերթին՝  ԱՄՆ ՄԶԳ ղեկավար Սամանթա Փաուերը, ով այցով գտնվում է Հայաստանում, հաղորդել է, որ ԱՄՆ-ը Հայաստանին կտրամադրի 11,5 միլիոն դոլարի աջակցություն՝ Լեռնային Ղարաբաղից տեղահանված մարդկանց մարդասիրական կարիքների համար:

Բացի այդ, ինչպես ավելի վաղ հաղորդել է ԱրմԻնֆո-ն, վկայակոչելով ՀՀ-ում Շվեդիայի դեսպանին, Շվեդիան Շվեդական Միջազգային զարգացման և համագործակցության գործակալության (SIDA) միջոցով 15 միլիոն շվեդական կրոն է հատկացրել Կարմիր խաչի միջազգային կոմիտեին' Լեռնային Ղարաբաղի բնակչության մարդասիրական կարիքները հոգալու համար: Եվս 7 մլն եվրո խոստացել է հատկացնել Ֆրանսիան։