Եվրապատգամավոր. Չեն կարող լինել արդար բանակցություններ, երբ քո ձեռքում զենք կա. դա արդեն շանտաժ է

Արմինֆո. Չեն կարող լինել արդար բանակցություններ, երբ քո ձեռքում զենք կա. դա արդեն շանտաժ է։ Այդ մասին նոյեմբերի 3 - ին Երեւանում կայացած մամուլի ասուլիսում հայտարարել է Եվրախորհրդարանի պատգամավոր, իտալացի քաղաքական գործիչ Ֆաբիո Մասիմո Կաստալդոն ՝ անդրադառնալով հայ-ադրբեջանական առաջնագծում տիրող իրավիճակին։

Ընդ որում, նա ընդգծել է, որ Եվրախորհրդարանի պատվիրակությունը Հայաստան է ժամանել նրա համար այս դժվարին ժամանակահատվածում, որպեսզի արտահայտի իր աջակցությունը եւ ցուցադրի եվրոպական ներկայությունը, ինչպես նաեւ հանձնառությունը ժողովրդավարական արժեքներին, այդ թվում ՝ մարդու իրավունքների ոլորտում:

"Մենք եկել ենք ասելու, որ խստորեն դատապարտում ենք Ադրբեջանի իշխանությունների սեպտեմբերյան ագրեսիան Հայաստանի ինքնիշխան տարածքների նկատմամբ ։ Մենք նաև դատապարտում ենք գերիների նկատմամբ դրսևորված վայրագությունները. դա դատապարտելի է և մարդկության դեմ հանցագործություն է։ Վստահ եմ, որ չի կարելի խաղաղության հասնել ուժային հարկադրանքի միջոցով, դա հնարավոր է անել միայն դիվանագիտական դաշտում", - ասել է իտալացի քաղաքական գործիչը։

Նա նաև ընդունել է ադրբեջանական կողմից ՀՀ ավելի քան 130 քառ.կմ տարածքի գրավման փաստը, ընդգծելով, որ օգտագործում է շփման գիծ տերմինը, այլ ոչ թե Հայաստանի և Ադրբեջանի միջև միջազգայնորեն ճանաչված սահման, խոսելով ստեղծված իրավիճակի մասին, ելնելով հենց այդ փաստից։ "Անվիճելի է փաստը, որ Ադրբեջանը զավթել է Հայաստանի ինքնիշխան տարածքները", - ասել է Կաստալդոն:

Ընդ որում, նա ընդգծել է, որ տարածաշրջանում արդար կարգավորման կարելի է հասնել միայն Հայաստանի տարածքային ամբողջականությունը և ինքնիշխանությունը հարգելու, ինչպես նաև արցախահայության ինքնորոշման իրավունքն ապահովելու միջոցով:

Միևնույն ժամանակ, նա հիշեցրել է, որ ավելի վաղ Եվրախորհրդարանը բանաձև էր ընդունել ՝ ի պաշտպանություն հայկական մշակութային արժեքների ։ Նրա խոսքով ՝ փաստաթղթում դատապարտվում են ադրբեջանական վերահսկողության տակ անցած տարածքներում հայկական մշակութային ժառանգության նկատմամբ կատարված հանցագործությունները ։ Նա հավելել է, որ խոսքը եկեղեցիների, պատմամշակութային հուշարձանների և, նույնիսկ, գերեզմանատների մասին է, քանի որ հայկական պատմությունը շատ հարյուրամյակներ ունի:

Կաստալդոն նաև հավելել է, որ բանաձևում կոչ է արվում ազատ արձակել Ադրբեջանում պահվող բոլոր ռազմագերիներին և քաղաքացիական անձանց:

Նշենք, որ հոկտեմբերի 31-ին ՀՅԴ Հայ դատի Եվրոպայի գրասենյակի նախաձեռնությամբ Հայաստան է ժամանել Եվրախորհրդարանի փաստահավաք առաքելություն, որն այստեղ կլինի մինչեւ նոյեմբերի 4-ը: Այցը նախաձեռնվել է ՝ ելնելով Հայաստանի նկատմամբ ադրբեջանական ագրեսիային հակազդելու և Արցախին պարտադրված ադրբեջանական մեկուսացման հաղթահարման հրամայականից, ինչպես նաև արցախյան հակամարտության մշտական միջազգայնացման ապահովման անհրաժեշտությունից և, ընդհանրապես, Հայ դատի համակարգի կողմից հայկական շահերի պաշտպանության անհրաժեշտությունից։ Պատվիրակության կազմում են Նիդերլանդներից Եվրախորհրդարանի պատգամավոր, ԵԺԿ քաղաքական խմբի անդամ, Արցախի հետ ԵԽ բարեկամության խմբի համահիմնադիր Պետեր վան Դալենը, ԵԽ նախկին փոխնախագահ, Իտալիայից անկախ պատգամավոր Ֆաբիո Մասիմո Կաստալդոն, գերմանացի պատգամավոր Լարս Պատրիկ Բերգը: