Կիրիլ Սերեբրյաննիկով. "Հայաստանի պատմությունն ու մշակույթը և այն  մարդիկ, ովքեր այն արարել են, վիթխարի էներգիա է, որով կարելի է ապրել ու աշխատել"

Արմինֆո. Հայաստանում նոյեմբերի 21-ից մեկնարկել է High Fest 19-րդ միջազգային թատերական փառատոնը, որն այս տարի նվիրված է նրա գեղարվեստական ղեկավար Եվգենյա Պոդպոմոգովայի հիշատակին եւ անցկացվում է "Բառեր, Բառեր, Բառեր" կարգախոսի ներքո:

High Fest փառատոնի հիմնադիր և նախագահ Արթուր Ղուկասյանի ջանքերի շնորհիվ հայ հասարակությանը հնարավորություն է ընձեռվե լսելու աշխարհահռչակ թատերական և կինոռեժիսոր Կիրիլ Սերեբրյաննիկովի խոսքը: Zoom-հանդիպման ժամանակ, որին ներկա էին թատերական բուհի ուսանողներն ու ռեժիսորի ստեղծագործության երկրպագուները, նա խոսել է մարդկանց կյանքում թատրոնի դերի, արվեստի, իր բեմադրությունների, դերասանական վարպետության և Հայաստանի մասին: Սերեբրյաննիկովն ընդգծել է, որ թատրոնը հասարակության կրթության, տարբեր սերնդի մարդկանց մոտենալու միջոցներից մեկն է, իսկ թատրոնի հետ, ինչպես նշել է ռեժիսորը, մարդիկ մեծանում են: Սակայն երիտասարդությանը թատերական արվեստին հաղորդակից դարձնելու համար, մաեստրոյի կարծիքով, անհրաժեշտ է ավելի պարզ աշխատել ։ Ընդ որում, նա չի կասկածում, որ երիտասարդները կարող են ընդունել բարդը, այլ հարց է, թե արդյոք նրանք կկարողանան դա լիարժեք հասկանալ։

Խոսելով բեմադրության համար արտիստների ընտրության մասին ՝ Կիրիլ Սերեբրյաննիկովը նշել է, որ միշտ ճշգրտությամբ է որոշում յուրայիններին ։ "Մարդը կարող է լավ արտիստ լինել, բայց միաժամանակ չլինել "իմը", - ասել է նա: Ռուսական գլխավոր թատերագետի համար չափազանց կարեւոր է արտիստի հրապարակայնությունը։ <Նա պետք է, առաջին հերթին, լինի անձ. Հնարավոր է ՝ կոպիտ հնչի, բայց դեբիլները թատրոնում ավելի վտանգավոր են, քան կյանքում", - ասել է ռեժիսորը։

Հիշելով իր վերջին այցը Հայաստան՝ Կիրիլ Սերեբրյաննիկովը պատմել է, որ տպավորված է եղել երեխաների ՏՏ դպրոցով (Թումո), Մատենադարանով, Սերգեյ Փարաջանովի թանգարանով, Դիլիջանի միջազգային դպրոցով: "Սա խոսում է այն մասին, որ ժամանակի ընթացքում երիտասարդ տղաները, ովքեր

անցել են վերապատրաստման այս կուրսը, իհարկե, բոլորովին այլ են լինելու", - նկատել է նա։

Պատասխանելով ԱրմԻնֆո-ի թղթակցի հարցին' ռեժիսորը պատմել է իր տպավորությունների մասին Հայոց ցեղասպանության թանգարան այցելությունից հետո: Թանգարանն անվանելով ցավի վայր ՝ Սերեբրյաննիկովը նկատել է, որ դրա հետ մեկտեղ նման հաստատությունը նաեւ ուժի վայր է, քանի որ տալիս է այդ ուժը: Այդ կապակցությամբ նա զուգահեռներ է անցկացրել Իսրայելի ժողովրդի ցեղասպանության ՝ Հոլոքոստի հետ։ "Կարեւոր է, որ, ինչպես Իսրայելում ժամանակին մարդիկ ասել են, որ մենք չենք ուզում այսուհետեւ զոհ լինել, զոհի պաշտամունք ստեղծել, այլ  լինենք մարդիկ, ովքեր ստեղծում եւ առաջ են գնում: Բայց դրա համար պետք էր Հոլոքոսթի ողբերգության և ցանկացած ցեղասպանության գիտակցում՝ առաջ գնալու համար», - ընդգծել է ռեժիսորը:

Սերեբրյաննիկովը նաեւ հավելել է, որ հարուստ մշակույթը, Հայաստանի պատմության իրադարձությունները, եւ այն մարդիկ, ովքեր այդ պատմությունն արարել են, վիթխարի էներգիա են, գանձ, որով կարելի է ապրել եւ աշխատել: Նա նաեւ ընդգծել է, որ հայկական թատերագետների շրջանում, ելնելով վերոգրյալից, "ինչի մասին կարելի է բեմադրել ներկայացումներ" հարց չպետք է ծագի:

Հիշեցնենք, որ Կիրիլ Սերեբրյաննիկովն իր ռեժիսորական ուղին սկսել է հայրենի Դոնի Ռոստովում, որտեղ 1994 թվականից ներկայացումներ է բեմադրել քաղաքի դրամատիկական թատրոններում: 2000 թվականից Սերեբրյաննիկովը սկսել է աշխատել Մոսկվայում, որտեղ դրամատուրգիայի եւ ռեժիսուրայի կենտրոնում իր դեբյուտը կատարել է Վ.Սիգարեւի պիեսի հիման վրա "Պլաստիլին" ներկայացումը: Սերեբրյաննիկովը բազմաթիվ դրամատիկ բեմադրությունների հեղինակ է: Նա նաեւ բեմադրել է օպերաներ Սանկտ Պետերբուրգի Մարիինյան թատրոնում, Մոսկվայի մեծ թատրոնում, Բեռլինի Komische Oper-ում, Շտուտգարդի օպերայում, Ցյուրիխի օպերային թատրոնում: 2006 թվականից Կիրիլ Սերեբրեննիկովը միջազգային "Տարածք" դպրոց-փառատոնի գեղարվեստական տնօրեններից մեկն է։ "Պլատֆորմ" նախագծի հեղինակ և գեղարվեստական ղեկավար (2011-2014 թթ.): 2012 թվականին Սերեբրեննիկովը դերասանա-ռեժիսորական դասընթաց է թողարկել ՄԽԱՏ դպրոց-ստուդիայում, որի հիման վրա ստեղծվել է "Յոթերորդ ստուդիան": 2012 թվականի օգոստոսից "Գոգոլ-կենտրոնի" հիմնադիր և գեղարվեստական ղեկավար է: Ստանիսլավսկու անվան մրցանակի դափնեկիր, "Ոսկե դիմակ", "Բյուրեղապակյա Տուրանդոտ", "ՏԵՖԻ", "Եվրոպա – նոր թատերական իրականություն", Հռոմի կինոփառատոնի գլխավոր մրցանակի դափնեկիր, Լոկառնոյի փառատոնի մրցանակակիր, "Կինոտավր", Վենետիկի կինոփառատոնի, Կաննի կինոֆես - տիվալի և շատ այլ ֆիլմերի մասնակից: 2018-ի օգոստոսին Կիրիլ Սերեբրեննիկովը դարձավ Ֆրանսիայի Արվեստի եւ գրականության շքանշանակիր:

Նշենք, որ High Fest թատերական փառատոնն առաջին անգամ անցկացվել է 2003 թվականին եւ մեծ հաջողություն է ունեցել: Եվրոպական փառատոնների ասոցիացիան High Fest-ը ներառել է եվրոպական 715 փառատոնների շրջանում լավագույն 24-ի ցանկում: Փառատոնի շնորհիվ Հայաստանն ինտեգրվեց միջազգային թատերական ցանցերին՝ Մանկական և պատանեկան թատրոնների միջազգային ասոցիացիային (ASSITEJ) և Համաեվրոպական թատերական ցանցին (IETM)։

Այս տարի փառատոնի շրջանակներում թատրոնի սիրահարներին հնարավորություն է ընձեռվել առցանց դիտել ԱՄՆ-ի Arlekin Players Theatre թատրոնի բեմադրությունը, ռեժիսոր Իգոր Գոլյակի պերֆորմանսը ՝ Ա. Պ. Չեխովի "Բալի այգի" պիեսի հիման վրա, լեհ ռեժիսոր Քշիշտոֆ Գարբաչովսկու "Բացատրություն" և "Դադարեցնելով Աստծո դատաստանը" ներկայացումները և այլն: Ընդհանուր առմամբ, փառատոնի ծրագիրը հագեցած է հեղինակային ներկայացումների ցուցադրություններով, թատերական արվեստի գործիչների հետ հանդիպումներով, գիտաժողովներով և այլն:

Փառատոնը նոյեմբերի 24-ին փակվելու է Royal District (Գերմանիա-Վրաստան) թատրոնի  "Տրոյանկա" բեմադրությամբ, որը ցուցադրվելու է Կ. Ստանիսլավսկու անվան ռուսական թատրոնի բեմում: