Ժիրայր Սէֆիլյան. <Սասնա ծռերի> պրագմատիզմը՝ ապագայի համար աշխատանքում

Արմինֆո.<Սասնա Ծռեր> կուսակցության պատվավոր ներկայացուցիչ, Արցախյան պատերազմի հերոս Ժիրայր Սէֆիլյանն ԱրմԻնֆո-ին հարցազրույցում մեկնաբանում է ներքաղաքական վերջին իրադարձությունները Հայաստանում, կիսվում երկրի և հայության ապագայի իր տեսլականով, ներկայացնում իր կուսակցության դիրքորոշումը Հայաստանի ներքին և արտաքին քաղաքականության առնչությամբ:

Արդյո՞ք Հայաստանում մայիսին տեղի ունեցած իշխանափոխության արդյունքներին ներքին և արտաքին սպառնալիքներ եք տեսնում դեկտեմբերյան ընտրություններին նախորդող՝ հարաբերական անիշխանության ժամանակշրջանում:

Ոչ: Մարտահրավերները և սպառնալիքները անցյալից են գալիս, այսօր էլ նույնն են մնացել, սակայն, ի տարբերություն նախկին ժամանակաշրջանից, ժողովրդային զարթոնքը, որի շնորհիվ տեղի ունեցավ մայիսյան իշխանափոխությունը, էապես մեծացրեց դրանց դիմակայելու հնարավորությունները: Ցավոք սրտի, գործող կառավարությունը դեռևս չի կարողանում արդյունավետ կերպով օգտագործել առաջացած ժողովրդային ներուժը և չեզոքացնել սպառնալիքներն ու հաղթահարել մարտահրավերները:

Հայ հասարակությունն ընդհանուր առմամբ բավական ոչ միանշանակ ընդունեց Նիկոլ Փաշինյանի կառավարության մի շարք կադրային նշանակումները, ինչի գագաթնակետը Հունան Պողոսյանին Սյունիքի մարզպետ նշանակելն էր: Հասկանալի է, որ այդպիսով Փաշինյանն հարվածում է իր ռեյտինգին՝ հատկապես ընտրությունների նախաշեմին: Ձեր կարծիքով, ո՞րն է տրամաբանությունը և ինչի՞ կարող է հանգեցնել նման կադրային քաղաքականությունը:

Այո, նման կադրային քաղաքականությունը խիստ վնասակար և վտանգավոր է: Մենք հորդորել ենք պարոն Փաշինյանին ոչ միայն վերանայել իր կադրային քաղաքականությունը, այլև հանձնարարել ստուգելու Վալերի Օսիպյանի կամ Հունան Պողոսյանի նմանների նախկին գործունեությունը՝ պետականության և ժողովրդի դեմ կատարած հանցործությունների համատեքստում: Նման կադրային քաղաքականությունը խիստ վնասակար և վտանգավոր է այն պատճառով, որ կարող է կոտրել ժողովրդի ոգեղենությունն ու հավատը՝ փոխադարձաբար կտրուկ կերպով նվազեցնելով Նիկոլ Փաշինյանի ռեյտինգը: Իսկ ոգեղենության մարման և Նիկոլ Փաշինյանի ռեյտինգի սրընթաց անկման հավանականությունը մեզ շատ է մտահոգում, քանի որ դա էապես կմեծացնի ազգային շահերի և պետականության դեմ ծառացած մարտահրավերները: Կստեղծվի մի վիճակ, որ ձեռնտու է հակառակորդներին և շատ վտանգավոր է մեզ համար:

<Սասնա ծռեր> կուսակցության հիմնադիր համագումարում կուսակցության քարտուղարության համակարգող Վարուժան Ավետիսյանը հայտարարեց վարչապետի պաշտոնակատար Նիկոլ Փաշինյանին աջակցելու մտադրության մասին՝ առնվազն մինչև նոր խորհրդարանի ձևավորումը և դասական, քաղաքականորեն մրցակցային իրավիճակի ստեղծումը: Ինչպե՞ս են Ձեր կուսակցությունում պատկերացնում դասական, քաղաքականորեն մրցակցային իրավիճակը: Չե՞ք կարծում արդյոք, որ Հայաստանում դրա ձևավորման համար անհրաժեշտ են տարիներ, եթե ոչ՝ տասնամյակներ:

Կա երկու հանգամանք: Հեղափոխությունը՝ որպես մի գործընթաց, որը պետք է իր տրամաբանական ավարտին հասցվի և ընտրությունները:

Հեղափոխությանը մենք շարունակելու ենք աջակցել և ամեն կերպով ձգտելու ենք պահել նրա թիկունքը: Ընտրությունների ժամանակ մենք կներկայացնենք մեր ծրագիրը և ընտրողներին կձգտենք համոզել, որ մեզ ընտրեն: Անշուշտ, դասական, քաղաքականորեն մրցակցային իրավիճակ ստեղծելու համար ժամանակ է պետք: Վարուժան Ավետիսյանը նկատի է ունեցել այն պահը, երբ կմեկնարկի այդ իրավիճակը:

Հոկտեմբերի 2-ին ՀՀԿ, ՀՅԴ և գլխավորապես <Բարգավաճ Հայաստանի>  քաղաքական ինքնասպանության լույսի ներքո՝ շատ քաղաքական գործիչներ և փորձագետներ ապագա խորհրդարանում տեսնում են <Քաղաքացիական պայմանագրին>, <Ելք>-ին և Ձեր կուսակցությանը: Ո՞ր տեղում և ի՞նչ դերում եք տեսնում <Սասնա ծռերին> արտահերթ ընտրությունների արդյունքում:

Մենք լայն աջակցություն և հենարան ունենք ժողովրդի մեջ, ուստի մեր շանսը գնահատում ենք որպես ծանրակշիռ: Եթե ֆորս-մաժորային իրավիճակներ չլինեն և կարիք չլինի հանդես գալու կոնսոլիդացված ձևաչափերով, մեզ պատկերացնում ենք որպես այլընտրանքային բևեռը ձևավորող ուժ:

Ձեր կուսակցության նույն համագումարում հայտարարվեց հայ-ռուսական հարաբերությունների հիմք կազմող միջազգային բոլոր պայմանագրերը վերանայելու, Մոսկվայի նախաձեռնությամբ ստեղծված բոլոր ինտեգրացիոն միավորումներից դուրս գալու, 102-րդ ռուսական ռազմակայանի դուրս բերման

անհրաժեշտության մասին: Ինչո՞վ է պայմանավորված նման դիրքորոշումը, կարո՞ղ է դա շահաբաժիններ բերել Հայասանին, և արդյո՞ք կուսակցությունում հաշվարկել եք Ռուսաստանի հնարավոր պատասխանը:

Այդպիսի դիրքորոշումը բխում է ազգային ռազմավարական շահերից: Մինչև Հայաստանը չհաղթահարի տարածաշրջանի ռուս-թուրքական ճարտարապետությունը, չազատագրվի ռուսական գաղութատիրությունից, չստեղծի նվազագույն տարածք և հաղորդակցային հնարավորություններ ունեցող ազգային պետություն, մեր ապագան շարունակելու է մնալ վտանգված: Մենք համոզված ենք, որ վաղ թե ուշ Ռուսաստանը հաշվի է նստելու Հայաստանի և հայության ազգային շահերի հետ և համաձայնելու է իրավահավասար և փոխշահավետ գործակցության ձևաչափով հարաբերություններ հաստատել Հայաստանի հետ:

Ինչպե՞ս եք պատկերացնում ԱՄՆ և Եվրամիության հետ Հայաստանի հետագա հարաբերությունները: Ի՞նչ դեր և միջազգային գործառույթներ կարող է այսօր առաջարկել Հայաստանն Արևմուտքին լիարժեք համագործակցության համար:

Հայաստանը, տանդեմային դաշնակցություն հաստատելով Վրաստանի հետ, կարող է դառնալ և պետք է դառնա կամուրջ-միջնորդ ԱՄՆ-ի ու Եվրամիության և առաջնահերթորեն Իրանի, ինչպես նաև Մեծ Մերձավոր Արևելքի այլ երկրների միջև, որոնց հետ ունի ավանդական կապեր և որոնց հետ կարող է զարգացնել անվտանգային, տնտեսական, հաղորդակցային,

գիտատեխնիկական, ֆինանսաբանկային և այլ հարաբերություններ:

Շատերը Հայաստանում, ինչպես նաև Հայաստանից դուրս <Սասնա ծռերին> համարում են արմատական, իր առջև անիրականանալի նպատակներ, օրինակ՝ Կուր-Արաքսյան Հանրապետության ստեղծում, դնող ուժ: Չե՞ք կարծում արդյոք, որ հռետորաբանության որոշակի մեղմացումը կհանգեցնի Ձեր կուսակցության հետևորդների զգալի աճի: Շատերն ուղղակի կդադարեն վախենալ ձեզանից՝ ի դեմս <Սասնա ծռերի> տեսնելով պրագմատիկ, ազգային և ժողովրդավարական ուժ, որը ձգտում է նոր պետականության կառուցման՝ բացառապես այսօրվա Հայաստանի և Արցախի տարածքում:

Սասնա Ծռեր համահայկական կուսակցությունը պրագմատիկ, ազգային և ժողովրդավարական ուժ է: Կուր-Արաքսյան Հանրապետությունն այն նվազագույն տարածքային-հաղորդակցային հնարավորություններն ապահովող պետական միավորն է, որը կարող է դառնալ ազգային սուբյեկտ ու ստեղծել ազգային գործոն: Այսօրվա ՀՀ և Արցախի պաշտոնական տարածքի միավորմամբ Նոր Հանրապետության ստեղծումը պետք է ոչ թե սահմանափակվի եղածով, այլ նպատակ դնի առնվազն ներառելու Նախիջևանը և Ադրբեջան արհեստական պետության տարածքում ընդարձակվելու մինչև Կուր գետի աջ ափը: Ներկայիս ՀՀ և Արցախի պաշտոնական տարածքի վրա Նոր հանրապետության ստեղծումը կմեկնարկի տարածաշրջանի ռուս-թուրք ճարտարապետության կազմաքանդումն ու Հայաստանի շահերին համահունչ տարածաշրջանային ճարտարապետության ձևավորումը, սակայն ընդամենը այդ տարածքի վրա մնալով, մենք զարգացման համար անհրաժեշտ ռեսուրսից անհամեմատ ավելի շատ մաս պետք է ծախսենք գոյատևելու նպատակով: Կուր-Արաքսյան Հանրապետության ծրագրի նկատմամբ վերաբերմունքը բխում է շատ պրագմատիկ մի հարցից՝ ուզում ենք ապրել արևի տակ ազատ ու արժանապատիվ կյանքով, ունենալ ապագա, մեր ամբողջ Հայրենիքին վերատիրանալու և հայությանը տուն վերադարձնելու ռեալ հույս, թե ոչ:

Որպես պրագմատիկ և ազգային ուժ՝ մենք  այդ հարցին պատասխանում ենք՝ այո, ուզում ենք և ամեն ինչ անելու ենք դրա համար: Ինչ վերաբերվում է այդ հարցը մտավախությունների համատեքստում ընկալող մեր հայրենակիցներին, ապա համոզված ենք, որ երևույթը ժամանակավոր է: Կյանքը և մեր գաղափարական աշխատանքը փարատելու են բոլոր կասկածներն ու մտավախությունները և շուտով այդ հարցի վերաբերյալ համայն հայությունն ունենալու է միասնական դրական տեսակետ: Մենք ապագայի ուժ ենք և, ընթացիկ քաղաքական առաջնահերթությունները հաշվի առնելով հանդերձ, գերադասում ենք ապագայի ռեյտինգը: