ԵՊՀ ուսանողական խորհուրդը բուհի ուսանողների հետ համերաշխ չէ պարտադիր զինվորական ծառայության տարկետումը չեղարկելու մասին օրինագծի հարցում

Արմինֆո.ԵՊՀ ուսանողական խորհրդի նախագահությունն իր դիրքորոշումն է հայտնել «Զինվորական ծառայության եւ զինծառայողների կարգավիճակի մասին՚ օրենքի նախագծի եւ վերջին օրերի ուսանողական ցույցերի նկատմամբ` այդ առնչությամբ ընդունված հայտարարությունում:

«Վերոնշյալ օրենքի նախագծով նախատեսված տարկետման ձեւաչափի փոփոխության հետ առաջացած բողոքի խաղաղ ակցիաները, մենք համարում ենք հասարակական հարաբերությունների կարեւոր գործընթացներ: Ժողովրդավարության զարգացման ճանապարհին մեր պետության յուրաքանչյուր քաղաքացի կամ քաղաքացիների խումբ իր կարծիքն արտահայտելու ազատության սահմանադրական իրավունք ունի, իսկ պետությունը պարտավոր է ապահովել այդ իրավունքը: Ազատ կարծիք արտահայտելու, բողոքի խաղաղ ցույցեր եւ երթեր անցկացնելու մեր ուսանող ընկերների իրավունքները պաշտպանելու ենք օրենքով սահմանված բոլոր միջոցներով, ուստի պահանջում ենք հարգանքով վերաբերվել բողոքի ակցիաներին, դրանց մասնակիցներին եւ չտրվել տարատեսակ սադրանքների: Հիմք ընդունելով բոլոր ֆակուլտետների ուսանողների շրջանում քանակական եւ որակական տեղեկատվությունը, կարծիքների եւ դիրքորոշումների ամբողջությունը՝ հայտարարում ենք, որ ԵՊՀ ուսանողական խորհրդը չի կիսում «Զինվորական ծառայության եւ զինծառայողների կարգավիճակի մասին» օրենքի նախագծի շուրջ մեր ցուցարար ընկերների մոտեցումները:

Մենք դեմ ենք գիտությունն ընդդեմ անվտանգության ձեւաչափով բանավեճին, այս արժեքների ուղիղ հակադրմանը. բանակին վերաբերող խնդիրների քննարկումը չպետք է ամբողջովին միահյուսել գիտության հիմնախնդիրների հետ:

Հարց է առաջանում. մինչ այժմ որքանո՞վ է տարկետման առկայությունը լուծել գիտության խնդիրները եւ նպաստել Հայաստանում գիտության զարգացմանը, քանի՞ ասպիրանտ է, չանցնելով պարտադիր զինվորական ծառայություն ՀՀ Զինված Ուժերի շարքում, շարունակել գիտամանկավարժական գործունեությունը: Բավարար է, նույնիսկ, հպանցիկ աչքի անցկացնել վիճակագրությունը եւ ակնհայտ կդառնա, որ գիտության զարգացումը տարկետման խնդրի հետ կապելն արդարացված չէ:

Բոլորին հորդորում ենք հեռու մնալ 2016թ. ապրիլյան մարտական գործողություններին մասնակցած ուսանողների անունների շահարկումներից: ԵՊՀ Ուսանողական խորհրդի շարքերում կան 2016թ. ապրիլյան մարտական գործողությունների բազմաթիվ մասնակիցներ, ովքեր իրենց արիությամբ կանգնեցրել են թշնամու գրոհը, ում կողքին զոհվել են ծառայակից ընկերներ, եւ անընդունելի է նման բանավեճում մեր զոհված ընկերների հիշատակը շահարկելը:

Մենք շատ լավ գիտակցում ենք պատերազմի եւ խաղաղության գինը: Հասկանում ենք բանակում ծառայությունն անցնելուց հետո ուսումը շարունակելու նշանակությունն ու արդյունավետությունը, ինչպես նաեւ ծառայությունից հետո՝ համալսարանում սովորելու ընթացքում, հայրենիքի կանչով կամավոր ճակատ մեկնելու եւ հետո դա քաղաքական կարիերայի դրոշակ չդարձնելու գինը:

Կոչ ենք անում ցուցաբերել զսպվածություն, եւ խնդիրը լուծել հարգալից, միմյանց լսելու, առողջ բանավեճի, տարընթերցումներն ու տարըբռնումները քննարկելու միջավայրում:

Կոչ ենք անում քաղաքական ուժերին զերծ մնալ ուսանողությանը քաղաքականացնելու, ուսանողական ցույցերն ու երթերը կուսակցական եւ նեղ խմբային շահերին ծառայացնելու ցանկացած դրսեւորումներից: Մենք հարգում ենք ուսանողական նույն աթոռներին նստող մեր ընկերների կարծիք հայտնելու ազատությունը եւ պատրաստ ենք պաշտպանել նրանց իրավունքները՚, - ասվում է ԵՊՀ ուսանողական խորհրդի նախագահության հայտարարությունում:

Վերը նշված օրենքի դեմ բողոքող ուսանողները նախօրեին, արդեն չորրորդ օրն անընդմեջ դասադուլ են անցկացնում` հավաքվելով ԵԽՀ գլխավոր մասնաշենքի մոտ: Օրերս նրանց ընդունել է վարչապետ Կարեն Կարապետյանը, սակայն հանդիպումից հետո ուսանողները որոշել են շարունակել պայքարը` քանի դեռ հոկտեմբերի 27-ին ԱԺ-ում առաջին ընթերցմամբ ընդունված օրինագիծը օրակարգից չի հանվել: Նրանք կարծում են, որ այդ օրինագծի ընդունումը ուժգին հարված կլինի Հաայստանում բարձրագույն կրթության համակարգին և որակին:

Հիշեցնենք, որ օրինագիծը նախատեսում է պարտադիր զինծառայության տարկետման վերացում, 18 տարին լրացած բոլոր երիտասարդների զորակոչում` եթե չունեն ԶՈՒ-ում ծառայության հետ անհամատեղելի առողջական խնդիրներ: