Փորձագետ. Այսօր Ադրբեջանի զսպման գլխավոր խնդիրը գտնվում է հայ հասարակության ձեռքերում

Արմինֆո.Այսօր Ադրբեջանի զսպման գլխավոր խնդիրը գտնվում է հայ հասարակության ձեռքերում։ Այս մասին իր հոդվածում գրում է ադրբեջանագետ Տաթևիկ Հայրապետյանը։

«Մի պահ պատկերացրեք, որ դուք որևէ մայրաքաղաքի ԱԳՆ պաշտոնյա եք, ով զբաղվում է Հարավային Կովկասի հարցերով, մասնավորապես՝ հայ-ադրբեջանական խնդիրներով։ Դուք ուսումնասիրում եք իրավիճակը և տեսնում, որ Ադրբեջանը պետական մակարդակով Հայաստանի նկատմամբ տարածքային պահանջների նոր արշավ է սկսել։ Դուք ասում եք՝ դե եկեք տեսնենք, թե ինչ են խոսում այդ մասին Հայաստանում, որպեսզի ես կարողանամ դա զեկուցել իմ նախարարներին և փոխնախարարներին։ Դուք բացում եք Հայաստանի Հանրապետության ղեկավարի երեկվա մամուլի ասուլիսը և լսում, թե ինչպես է նա բառացիորեն արդարացնում Ադրբեջանի կողմից առաջ մղվող ագրեսիվ ծրագրերը՝ դրանում մեղադրելով հայկական ընդդիմությանը։ Պաշտոնյան գրում է իր երկրի ԱԳՆ-ին և հայտնում, որ Հայաստանն այդ ծրագրի առաջմղումը «տրամաբանական» է համարում։ Այնուհետև, երբ ադրբեջանցի պաշտոնյան իր օրակարգով գալիս է այդ երկրի ԱԳՆ, նրանք ասելու են, որ Հայաստանի կողմից որևէ փաստացի առարկություն չկա», - նշել է Տաթևիկ Հայրապետյանը՝ հավելելով, որ այսպիսով Փաշինյանը շատ ուղղակի և հստակ հանդես է գալիս ի պաշտպանություն Ադրբեջանի, և այս վտանգավոր զուգահեռները օգնում են Ադրբեջանին տարբեր երկրների մայրաքաղաքներում առաջ մղել իր օկուպացիոն ծրագիրը։

Փորձագետի խոսքով՝ X երկրի ոչ մի դիվանագետ ավելի շատ չի պաշտպանի հայկական շահերը, քան ինքը՝ հայ հասարակությունը։

«Ի վերջո, Արցախը հարյուրավոր տարիների պատմություն ունեցող անվանում է, որն արձանագրված է տարբեր պատմաբանների աշխատություններում ու քարտեզներում, էլ չեմ ասում այն մասին, որ Լեռնային Ղարաբաղի հակամարտությունը միջազգայնորեն ճանաչված հակամարտություն է։ Ոչ ոք չի ասի, թե՝ գիտեք, արցախահայության վերադարձի իրավունքը ամրագրված է միջազգային դատարաններում, բայց դա բավարար չէ, քանի որ Հայաստանի ղեկավարությունն այսօր պայքարում է դրա դեմ։ Նրանք չեն ասի, թե՝ գիտեք, մոլորակի վրա չկա որևէ իրական քարտեզ, որտեղ «Արևմտյան Ադրբեջան» անվանումը վերաբերում է Հայաստանի տարածքին։ Ոչ ոք չի անի այն, ինչ մենք ինքներս պետք է անենք։ Փոխարենը նրանք կլսեն ՀՀ իշխանությունների ներկայացուցիչների ելույթները, որոնք Ալիևի կամակատարներն են, և շատ հանգիստ կընդունեն ադրբեջանցի պաշտոնյաների պահանջները այս հարցով իրենց կողմից իրականացվող այս կամ այն միջոցառումների ժամանակ։

Ուստի ես ասում եմ, որ այս հարցում հանրային դաշտի ուժեղացումը շատ կարևոր է, քանի որ սա ազգային անվտանգության խնդիր է։ Եթե հանրային դաշտը միահամուռ կերպով դա անվանի տարածաշրջանային կայունությանը սպառնացող ագրեսիվ հայեցակարգ, ապա գուցե X երկրի դիվանագետն էլ դա ներառի իր զեկույցում։ Ի վերջո, մեր երկրում ընտրողների մեծամասնությունը չի ընդունել Ալիևի կամակատար Փաշինյանին։ Հետևաբար, X երկրի դիվանագետը կարող է հաշվի առնել դա իր զեկույցում։ Այսօր Ադրբեջանի զսպման գլխավոր խնդիրը գտնվում է հանրային դաշտի ձեռքերում», - ընդգծել է Տաթևիկ Հայրապետյանը։