Սամվել Կարապետյանն առաջարկում է անցկացնել խորհրդարանական ընտրությունների երկրորդ փուլ, կամ՝ նոր ընտրություններ 

Արմինֆո.Սամվել Կարապետյանի "Ուժեղ Հայաստան" դաշինքը Հայաստանի իշխանություններին առաջարկում է կամ անցկացնել խորհրդարանական ընտրությունների երկրորդ փուլ, կամ՝ նոր խորհրդարանական ընտրություններ: Այդ մասին հունիսի 12-ին դատարանի դիմաց լրագրողների հետ զրույցում հայտարարել է դաշինքի առաջնորդ Սամվել Կարապետյանը։ 

"Եվ մենք չենք հաղթել, և Փաշինյանը չի հաղթել։ Ես այն օրն էլ էի ասում, որ Հայաստանին լեգիտիմ իշխանություն է պետք, նա դա չապահովեց։ Ընտրությունները լիովին ձախողված են, և՝ կեղծված,և անցկացվել են ահաբեկչության, ձերբակալությունների պայմաններում։ Մեր բոլոր տարածաշրջանային ներկայացուցիչները կալանավորված են, ձերբակալվել է մոտ 780 մարդ", - ասել է նա։ 

Միաժամանակ, Կարապետյանը հաղորդել է, որ իր քաղաքական ուժն արդեն դիմել է ԿԸՀ և մտադիր է դիմել Սահմանադրական դատարան՝ ընտրությունների արդյունքները չեղյալ հայտարարելու և երկրորդ փուլ նշանակելու պահանջով: Նա կարծում է, որ ճիշտ կլինի երկրորդ փուլով որոշել՝ Փաշինյանն այս ընտրություններում հաղթել է, թե՝ ոչ։ 

Դիտարկմանը, թե ինչ կլինի, եթե ԿԸՀ-ն ու ՍԴ-ն մերժեն իրենց դիմումները, նա նշել է, որ նշանակում է ՝ երկրում կլինի ոչ լեգիտիմ իշխանություն: 

Ընդ որում, նա չի ասել, թե ինչպիսին են լինելու իրենց գործողությունները հետագայում, արդյոք վերցնելու են մանդատները, թե փողոցային պայքարի են գնալու։ Նրա խոսքով՝ իրենց առանցքային նպատակն է հեռացնել ՀՀ գործող վարչապետ Նիկոլ Փաշինյանին, և դա անել օրինական ճանապարհով: Նա հավելել է, որ եթե դա ավելի արագ  կարվի խորհրդարանի միջոցով, ուրեմն իրենք գնալու են խորհրդարան, եթե՝ փողոցային պայքարով,  գնալու են փողոց: 

Նա նշել է, որ ընտրությունների օրը ձերբակալվել են իրենց բոլոր շտաբների ղեկավարները, այդ գործողությունները խոսում են այն մասին, որ ընտրությունները չեն կարող լինել լեգիտիմ: Կարապետյանը նաև վստահեցրել է, որ իր քաղաքական ուժը սխալներ թույլ չի տվել, այլապես 4 ամսվա ընթացքում 350 հազար քաղաքացու աջակցությունը չէր ստանա: 

Իր հետագա անելիքների մասին հարցին Կարապետյանը պատասխանել է, որ իրենք առաջարկում են կամ երկրորդ փուլ կազմակերպել, կամ՝ նոր ընտրություններ՝ չեղարկելով այս արդյունքները: Նրա խոսքով՝  որ տարբերակն իշխանություններն ընտրեն, իրենք դրան էլ կգնան։

Հիշեցնենք, որ 2026 թվականի հունիսի 7-ին Հայաստանում տեղի ունեցան հերթական խորհրդարանական ընտրությունները։ Ընտրություններին մասնակցությունը կազմել է 58,97 տոկոս։  Հայաստանի Կենտրոնական ընտրական հանձնաժողովի նախնական տվյալների համաձայն, բոլոր 2005 ընտրատեղամասերի ձայների հաշվարկի արդյունքում խորհրդարան են անցնում Նիկոլ Փաշինյանի իշխող "Քաղաքացիական պայմանագիր" կուսակցությունը, Սամվել Կարապետյանի "Ուժեղ Հայաստան" դաշինքը, երկրորդ նախագահ Ռոբերտ Քոչարյանի "Հայաստան"դաշինքը: Մյուս թեկնածուների արդյունքները ցածր են կուսակցությունների համար անհրաժեշտ  4 տոկոս, դաշինքների համար՝ 8-10 տոկոս անցողիկ շեմից։ Հատկանշական է, որ գործարար Գագիկ Ծառուկյանի "Բարգավաճ Հայաստան" կուսակցությունը կորցրել է անցողիկ 4%-ը՝ Հայաստանի Կենտրոնական ընտրական հանձնաժողովի կողմից խորհրդարանական ընտրությունների քվեարկության նախնական արդյունքների ճշգրտումից հետո: Այդ առնչությամբ կուսակցությունը չի անցնի նոր խորհրդարան։

Նշենք, որ ընտրությունների օրը վաղ առավոտից դիտորդներն ու լրագրողներն ահազանգում էին իշխող ուժի կողմից քվեարկության կազմակերպման բազմաթիվ խախտումների մասին: Այսպիսով, Փաշինյանի կուսակցությունը հնարավորություն ունի միանձնյա ձևավորել երկրի կառավարությունը ՝ ստանալով Հայաստանի խորհրդարանում մանդատների մեծամասնությունը: Այդ մասին նա հանդիսավոր հայտարարել էր ուշ գիշերին, երբ մշակվել էին ընտրատեղամասերի միայն մոտ 10% - ի տվյալները։