Զախարովա. Ռուսաստանի հետ բարեկամական հարաբերությունները պահպանելու Հայաստանի խոսքերը հակասում են նրա իրական քայլերին

Արմինֆո.Ռուսաստանի հետ բարեկամական հարաբերությունները պահպանելու Հայաստանի խոսքերը հակասում են պաշտոնական Երևանի իրական քայլերին։ Այս մասին մայիսի 28-ին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ անդրադառնալով հայ-ռուսական հարաբերությունների ներկա վիճակին։

Ռուս դիվանագետը հիշեցրել է, որ Ռուսաստանը, ինչպես և նախկինում, Հայաստանին համարում է իր բնական դաշնակիցը Հարավային Կովկասում, իսկ հայ ժողովրդին՝ եղբայրական։ Նա նաև հավելել է, որ ռուսական կողմը բոլոր ժամանակներում ծանր պահերին օգնության է հասել բարեկամ հայ ժողովրդին՝ իր խոսքերն ամրապնդելով նման օգնության կոնկրետ օրինակներով ինչպես խորհրդային տարիներին, այնպես էլ նորագույն պատմության մեջ։

«Մենք լսում ենք հայ պաշտոնյաների հավաստիացումները Ռուսաստանի հետ հարաբերությունները պահպանելու Երևանի մտադրության մասին, և այն մասին, որ այնտեղ թույլ չեն տա հանրապետությունն օգտագործել մեր երկրի դեմ։ Սակայն մենք սովոր ենք դատել ոչ միայն խոսքերով, այլև գործերով։ Իսկ դրանք հիշատակված խոսքերի հետ ինչ-որ պատճառով ավելի ու ավելի են հակասում»,- հայտարարել է նա։

Միևնույն ժամանակ Զախարովան ընդգծել է, որ Ռուսաստանը երբեք դեմ չի եղել Հայաստանի կողմից արտաքին կապերի դիվերսիֆիկացմանը։ Սակայն, նրա խոսքով, հայկական իշխանությունների այսօրվա գիծը հազիվ թե կարելի է այդպես անվանել։ Նա համոզված է, որ այն չի կարելի անվանել նաև հավասարակշռված ՌԴ-ի նկատմամբ։

Ակնառու լինելու համար Զախարովան ուշադրություն է հրավիրել այն փաստի վրա, որ հայկական իշխանությունները ձգձգում, սառեցնում են ռուսական կողմի լուրջ առաջարկները՝ միևնույն ժամանակ համակարգված աշխատանք տանելով իբր եվրոստանդարտների ներդրման ուղղությամբ, ստորագրում են ինչ-որ հուշագրեր, ինչ-որ շրջանակային պլաններ արևմտյան մայրաքաղաքների հետ։

«Ամեն ինչ ոչինչ, բայց այդ արևմտյան մայրաքաղաքները Ռուսաստանին իսկական հիբրիդային պատերազմ են հայտարարել և հրապարակայնորեն ձևակերպում են դա որպես մեր երկրին, ինչպես իրենք են հորինել, ռազմավարական պարտություն հասցնել։ Այդ դեպքում ում հե՞տ է Երևանը կնքում պլանների ու մտադրությունների մասին այս լիովին ռազմավարական պայմանավորվածությունները։ Նրանց հե՞տ, ովքեր չարիք են կամենում մեր ընդհանուր եվրասիական տարածքին։ Ի դեպ ասած, նրանք կոնկրետ սկսում են փոխգործակցել Եվրամիության, Արևմտյան Եվրոպայի երկրների հետ այն ոլորտներում, որտեղ ավանդաբար հուսալի և հենց Հայաստանին հսկայական բոնուսներ բերող կողմը Մոսկվան էր»,- ասել է ռուս դիվանագետը՝ ևս մեկ անգամ նկատելով, որ այս փոխգործակցությունից հայկական կողմին վնաս չկա, այլ կա միայն օգուտ (Ռուսաստանի հետ համագործակցությունից)։

Նա ուշադրություն է հրավիրել այն փաստի վրա, որ Մոսկվան տեսնում է, թե ինչպես են փորձում իրեն փոխարինել այդ ուղղություններում, ընդ որում՝ այս գործողությունների արդյունքում իրական հաջողությունների բացակայության պայմաններում։

Զախարովան ընդգծել է, որ Մոսկվայում տեսնում են եվրոպացիների հետ Հայաստանի ռազմավարական գործընկերության մասին հռչակագրերի մի ամբողջ շարք, ընդ որում՝ այնպիսի երկրների հետ, որոնք առանց թաքցնելու իրենց առջև նպատակ են դնում ՌԴ-ին ռազմավարական պարտություն հասցնել, և նրանց հետ, ովքեր գտնվում են եվրոպական ռուսատյացության առաջնագծում։ Որպես օրինակ նա բերել է Հայաստանի փոխգործակցությունը Լիտվայի հետ։ «Եվ հայ-ռուսական հարաբերությունների մասին Հայաստանի իշխանությունների հանգստացնող հայտարարությունները կտրուկ հակասում են, բախվում են այն ամենի հետ, ինչ մենք տեսնում ենք բուռն նախընտրական քարոզարշավի ժամանակ։ Նաև նկատում ենք Նիկոլ Վովայի Փաշինյանի թիմի ցուցադրական թողտվությունը հակառուսական տրամադրությունների խթանմանն ուղղված Արևմուտքի նպատակաուղղված արշավին»,- հավելել է նա։

Ռուս դիվանագետն ընդգծել է, որ դա տեղի է ունենում բառացիորեն ամեն օր։ Որպես օրինակ նա բերել է այն պնդումներն ու լրատվական ներհոսքերը, թե Ռուսաստանը միջամտում է Հայաստանի ներքին գործերին և այն ենթարկում հիբրիդային հարձակումների։ Զախարովան փաստել է, որ այս ամենն ուղեկցվում է յուրօրինակ լրտեսամոլությամբ և ԱԱԾ (ФСБ) ու ՊԱԿ (КГБ) գործակալների մասին հեքիաթներով։