Բրյուսել. ԵՄ-ը ջերմորեն ողջունում է Հայաստանի հետ երկկողմ առևտուր սկսելու մասին Թուրքիայի հայտարարությունը

Արմինֆո.ԵՄ-ն ջերմորեն ողջունում է Հայաստանի հետ երկկողմ առևտուր սկսելու մասին Թուրքիայի հայտարարությունը։ Այդ մասին ասվում է ԵՄ արտաքին և անվտանգության քաղաքականության հարցերով մամուլի քարտուղար Անիտա Հիպերի հայտարարությունում:

Նրա խոսքով՝ սա նշանակալի իրադարձություն է հարաբերությունների կարգավորման գործընթացում, ինչը հաստատվում է նաև երկու երկրների միջև երկաթուղային հաղորդակցության վերականգնման հարցերով երկկողմ աշխատանքային խմբի ՝ 2026 թվականի ապրիլի 28-ի վերջին նիստում։

"Այդ կարեւոր քայլը կարող է նպաստել երկու երկրների միջեւ առևտրային և տնտեսական հնարավորությունների ընդլայնմանը,  դրական ազդեցություն ունենալով ողջ Հարավային Կովկասի, ինչպես նաեւ ԵՄ վրա։ Մենք կոչ ենք անում երկու երկրներին շարունակել համագործակցությունը, այդ թվում ՝ երկկողմ սահմանի բացման ուղղությամբ",- հայտարարել է ԵՄ ներկայացուցիչը։

Նշենք, որ Թուրքիայի ԱԳՆ պաշտոնական ներկայացուցիչ Օնջու Քեչելին մայիսի 13-ին հայտարարել է, որ Հայաստանի հետ հարաբերությունների կարգավորման գործընթացում ձեռնարկվող վստահության ամրապնդման միջոցառումների շրջանակում, որը շարունակվում է 2022 թվականից, 2026 թվականի մայիսի 11-ի դրությամբ ավարտվել է մեր երկրի և Հայաստանի միջև ուղիղ առևտրի մեկնարկի բյուրոկրատական նախապատրաստությունը։ Միևնույն ժամանակ, նա հավելել է, որ երկու երկրների միջև ընդհանուր սահմանի բացման համար անհրաժեշտ տեխնիկական և բյուրոկրատական աշխատանքները դեռևս շարունակվում են: Երևանում ողջունել են թուրքական կողմի այդ քայլը։

Հայ-թուրքական հարաբերությունների կարգավորման գործընթացի մեկնարկի մասին 2021 թվականի դեկտեմբերի 13-ին հայտնել էր Թուրքիայի այն ժամանակվա արտգործնախարար Մևլութ Չավուշօղլուն։ Ընդ որում, նա ընդգծել էր, որ Անկարան գործելու է Ադրբեջանի հետ համակարգմամբ՝ Հայաստանի հետ հարաբերությունների կարգավորմանն ուղղված քայլերի վերաբերյալ: Կողմերը կարգավորման գործընթացում Թուրքիայի եւ Հայաստանի հատուկ ներկայացուցիչներ են նշանակել Սերդար Քըլըչին եւ Ռուբեն Ռուբինյանին, որոնք արդեն բանակցությունների մի քանի փուլ  են անցկացրել, սակայն ինչ-որ բեկումնային որոշումների հասնել դեռ չի հաջողվել՝ բացի ավիաբեռնափոխադրումներից եւ ուղեւորափոխադրումներից: