ԲՀԿ մամուլի քարտուղար․ Հենց Գագիկ Ծառուկյանի շնորհիվ է վերածնվել հայկական սպորտը

Արմինֆո. Հայկական մարզաշխարհը վերածնվել է հենց "Բարգավաճ Հայաստան" կուսակցության (ԲՀԿ) առաջնորդ Գագիկ Ծառուկյանի ՝ ազգային օլիմպիական կոմիտեի (ՀԱՕԿ) նախագահի պաշտոնում գտնվելու շնորհիվ: Այդ մասին Facebook-ի իր էջում գրել է "Բարգավաճ Հայաստան" կուսակցության մամուլի քարտուղար Իվետա Տոնոյանը՝ ի պատասխան ՀՀ վարչապետի աշխատակազմի ղեկավար Արայիկ Հարությունյանի այն արտահայտությունների, թե Ծառուկյանն արդեն 70 տարեկան է և իրավունք չունի զբաղեցնել ՀԱՕԿ նախագահի պաշտոնը:

«Լավ կլիներ ինչ որ մեկը Արայիկ Հարությունյանին հարց ուղղեր՝ դու իրավունք ունե՞ս Ծանրամարտի ֆեդերացիայի նախագահ լինես, իսկ Գագիկ Ծառուկյանը իրավունք չու՞նի Հայաստանի ազգային օլիմպիական կոմիտեի նախագահը լինել։

Ի՞նչ կապ ունես դու ընդհանրապես սպորտի հետ, ի՞նչ մարզական հետագիծ ունես, ծանրամարտի մասին ի՞նչ իմացություններ ունես։

2004 թվականին, երբ Գագիկ Ծառուկյանը, 48 տարեկանում ստանձնում էր Հայաստանի ազգային օլիմպիական կոմիտեի նախագահի պարտականությունները և հայկական սպորտը գտնվում էր խայտառակ ծանր վիճակում՝ շատերն էին հարցնում՝ արդյո՞ք դա պետք է իրեն։ Մարզադպրոցները կիսաքանդ էին, ենթակառուցվածքները՝ ավերված, միջազգային ասպարեզում հաջողությունները՝ սակավ, մարզիկները՝ անտեսված։ Շատ մարզադպրոցներում անգամ տարրական պայմաններ չկային մարզվելու համար, մարզիկներն արտագաղթում էին, հայկական սպորտը կանգնած էր լուրջ մարտահրավերների առաջ։

Բայց Գագիկ Ծառուկյանի դիրքորոշումը հստակ էր՝ սա իր պատվի և երկրի արժանապատվության հարցն է ու ոչ մի դժվարություն չի կարող վախեցնել։ Նրա պաշտոնավարման շուրջ երկու տասնամյակների ընթացքում կառուցվեցին և վերանորոգվեցին տասնյակ մարզադպրոցներ, ապահովվեցին մարզագույքով, արտագաղթած մարզիկներից շատերը հետ վերադարձան ու սկսեցին եռագույնի ներքո հանդես գալ, սահմանվեց մարզիկների խրախուսման ու պարգևատրման նոր մշակույթ։ Հայ մարզաշխարհը վերածնվեց, իսկ մեր աշխարհասփյուռ հայրենակիցները բազմաթիվ առիթներ ունեցան հպարտանալու մեր մարզիկների հաղթանակներով, մեր եռագույնը հազարավոր անգամներ բարձրացվեց միջազգային ամենահեղինակավոր հարթակներում ու հնչեց ազգային օրհներգը։

Այս հաղթանակների ճնշող մեծամասնությունը միշտ մեր ծանրամարտիկներն են նվաճել, քանզի ծանրամարտը մեր ամենաշատ մեդալ բերող մարզաձևն է դարձել Գագիկ Ծառուկյանի տարիների քրտնաջան աշխատանքից ու ահռելի ներդրումներից հետո։

Հիմա հարց Արայիկ Հարությունյանին՝ ո՞նց դու հայտնվեցիր Ծանրամարտի ֆեդերացիայի նախագահի պաշտոնում, ի՞նչ խոստումներ էիր տվել ծանրամարտի միջազգային ընտանիքում Հայաստանի դիրքերը բարելավելու մասին, որոնք այդպես էլ չկատարեցիր և ի վերջո՝ արդյո՞ք հայ մարզաշխարհը ընդունեց քեզ, որպես ֆեդերացիայի նախագահ։ Հարցերս հռետորական չեն», - գրել է ԲՀԿ մամուլի քարտուղարը։

Նշենք, որ ապրիլի 15-ին Հարությունյանը, ով նաև Ծանրամարտի ֆեդերացիայի նախագահն է, լրագրողների հետ զրույցում հայտարարել էր, որ Ծառուկյանը շուտով դառնում է 70 տարեկան, ինչի առնչությամբ այլևս իրավունք չունի զբաղեցնել այդ պաշտոնը: Նրա խոսքով ՝ Ծառուկյանը լարված քաղաքական շրջանի պայմաններում փորձում է ՀԱՕԿ-ի ընտրություններ անցկացնել, որպեսզի հերթական անգամ զբաղեցնի նախագահի պաշտոնը և ևս 4-5 տարի ղեկավարի կազմակերպությունը:

Ավելին, ապրիլի 13-ին  Ծառուկյանին Ազգային օլիմպիական կոմիտեի նախագահի պաշտոնից զրկելու պահանջով հայցադիմում է ներկայացվել դատարան՝ Ծանրամարտի ֆեդերացիայի անունից, որի նախագահն է ՀՀ վարչապետի աշխատակազմի ղեկավար Արայիկ Հարությունյանը ՝: Մասնավորապես, հայցադիմումում պահանջվում է 2025 թվականը սեպտեմբերի 9-ից դադարած ճանաչել Գագիկ Ծառուկյանի  լիազորությունները ՝ որպես ՀԱՕԿ նախագահի։ Անվավեր պետք է ճանաչվեն նաև այդ օրվանից "Բարգավաճ Հայաստան" կուսակցության առաջնորդի կողմից ընդունված բոլոր որոշումները, ինչպես նաև ՀԱՕԿ վերստուգիչ հանձնաժողովի բոլոր անդամների լիազորությունները: