Փաստաբան․ Դպրոցական Դավիթ Մինասյանին հիվանդանոցից բանտ են տեղափոխել

Արմինֆո.  Երևանի Սուրբ Աննա եկեղեցում ՀՀ վարչապետ Նիկոլ Փաշինյանի մասնակցությամբ տեղի ունեցած միջադեպից հետո երկամսյա կալանքի տակ գտնվող դպրոցական Դավիթ Մինասյանին «Նաիրի» բժշկական կենտրոնից տեղափոխել են բանտ: Այդ մասին Facebook-ի իր էջում գրել է Մինասյանի փաստաբան Լուսինե Մարտիրոսյանը:

Մինասյանին բանտ են տեղափոխել ապրիլի 13-ի ուշ երեկոյան։ Միևնույն ժամանակ, փաստաբանը պատմել է, որ իրենք դեռ չգիտեն, թե իրենց պաշտպանյալին որ բանտ են տեղափոխել: Նա միայն հաղորդել է, որ դպրոցականին հիվանդանոցից տարել են հաշմանդամի սայլակով, և նրա վիճակը դեռևս համատեղելի չէ կալանքի տակ պահելու հետ:

Ավելի վաղ հայտնի էր դարձել, որ դպրոցականի մոտ ախտորոշվել է փակ գանգուղեղային վնասվածք՝ վարչապետի թիկնազորի աշխատակցի կողմից դպրոցականին հասցված ուժեղ հարվածի հետեւանքով։

Հիշեցնենք, որ ապրիլի 1-ին ՀՀ դատարանը 18-ամյա Դավիթ Մինասյանի նախնական կալանքը երկու ամսով երկարաձգել է։ Քննիչները նրան մեղադրանք են առաջադրել ՀՀ Քրեական օրենսգրքի 297-րդ հոդվածի 1-ին մասով (խուլիգանություն) և ՀՀ Քրեական օրենսգրքի 452-րդ հոդվածի 3-րդ մասով (պաշտոնատար անձի օրինական պաշտոնեական կամ քաղաքական գործունեությանը խոչընդոտելը), որը նախատեսում է երկուսից հինգ տարի ազատազրկում: Միջադեպը տեղի է ունեցել մարտի 29-ին Սուրբ Աննա եկեղեցում՝ Ծաղկազարդի օրը, պատարագի ժամանակ, երբ Փաշինյանը, անվտանգության աշխատակիցների ուղեկցությամբ, շարժվում էր դեպի ելքը: Այդ պահին Մինասյանը ձեռքով կտրուկ շարժում է կատարել դեպի վարչապետը, սակայն նրա ձեռքը հետ են քաշել թիկնապահները: Նույն օրը համացանցում շրջանառվող տեսանյութերում երևում է, թե ինչպես անվտանգության ծառայության աշխատակիցը ուժեղ հարված է հասցնում Դավիթ Մինասյանի դեմքին, ինչի հետևանքով պատանին վայր է ընկնում, և վեր կենալուց հետո երկար ժամանակ ուշքի չի գալիս:

Հատկանշական է, որ Քննչական կոմիտեն գործ է հարուցել Քրեական օրենսգրքի «պաշտոնատար անձի օրինական պաշտոնեական կամ քաղաքական գործունեությանը խոչընդոտելը» հոդվածով, չնայած վարչապետ Փաշինյանն՝ ինքը, բազմիցս հայտարարել է, որ կիրակնօրյա պատարագներին մասնակցում է բացառապես որպես Հայ Առաքելական Եկեղեցու շարքային հետեւորդ։