Հայաստանի նախագահության ևս մեկ թեկնածու, քաղաքագետ Անդրեաս Ղուկասյանն առաջարկում բոյկոտել 2013 թվականի մարտի 18-ի նախագահական ընտրությունները:

ՀՀ նախագահի թեկնածու Անդրիաս Ղուկասյանը հանդես է եկել բաց նամակով, որը ներկայացնում ենք ստորև.

ՙՀՀ նախագահի թեկնածուներ Արամ Հարությունյանին, Արման Մելիքյանին, Հրանտ Բագրատյանին, Պարույր Հայրիկյանին, Վարդան Սեդրակյանին, Րաֆֆի Հովհաննիսյանին.

Հարգարժա՛ն պարոնայք, հանրությունը, որի իրավունքները երաշխավորված չեն, իսկ պետական իշխանությունը ամբողջությամբ գտնվում է մեկ քաղաքական ուժի ձեռքում, ըստ էության զրկված է իր Սահմանադրությունից։

 Քաղաքական գործիչը նա է, ով իր վրա է վերցնում է հանրության շահերը պաշտպանելու պարտքը։ Այսօր մենք ունենք իրավունք` ձեւավորելու Հայաստանի համար նոր քաղաքական օրակարգ։ Դրա հետ մեկտեղ, մեզ վրա է դրված երկրի քաղաքական ապագան որոշելու պատասխանատվությունը։ Առաջարկում եմ միասնաբար դուրս գալ ՀՀԿ-ի կողմից նախագծված ու կանխորոշված ընտրությունների ընտրապայքարից եւ միահամուռ նախաձեռնել երկրում համընդհանուր քաղաքացիական շարժում` հանուն արմատական փոփոխությունների։ Համոզված եմ, որ քրեաօլիգարխիկ համակարգի դեմ ուղղված քաղաքացիական շարժումը, որի առաջնորդները կլինեն Պարույր Հայրիկյանը, Րաֆֆի Հովհաննիսյանը եւ Հրանտ Բագրատյանը, հաջողությամբ կպսակվի։ Նաեւ հավատում եմ, որ Նախագահի մյուս թեկնածուները եւս, ճիշտ գնահատելով իրավիճակը, ազգային շահը կգերադասեն անձնական շահից։ Հանրությունը մեզանից գործնական քայլեր է սպասում, այլ ոչ թե անիմաստ պայքար, այսպես կոչված, երկրորդ տեղի համար: Կոչ եմ անում` մինչեւ ս.թ. հունվարի 15-ը միասնական ինքնաբացարկով սկիզբ դնել Հայաստանի Հանրապետությունում նոր քաղաքական իրադրության՚,-նշել է նա ՙՖեյսբուքի՚ իր էջում։

Նշենք, որ նախօրեին նման հայտարարությամբ էր հանդես եկել նաև ՙԱզգային համաձայնություն՚ կուսակցության ղեկավար Արամ Հարությունյանը: Իսկ նախագահական ընտրություններին մասնակցում է 8 թեկնածու, այդ թվում, Սերժ Սարգսյանը, Հրանտ Բագրատյանը, Րաֆֆի Հովհաննիսյանը, Պարույր Հայրիկյանը, ԼՂՀ նախկին արտգործնախարար Արման Մելիքյանը, քաղաքագետ Անդրեաս Ղուկասյանը, էպոսագետ Վարդան Սեդրակյանը, ինչպես նաև Արամ Հարությունյանը:

 ՙԱզատություն՚ կուսակցության նախագահ, ՀՀ նախագահի թեկնածու Հրանտ Բագրատյանը ֆեյսբուքյան իր էջում ներկայացրել է իր կայքը, որում ներկայացված է նրա տնտեսական ծրագիրը:

ՙԲարեկամներ։ Կարող եք այցելել www.bagratyanpresident.am կայքը և ծանոթանալ իմ նախընտրական տնտեսական ծրագրի հետ՝ ՙԸնդամենը 100 քայլ մինչև սոցիալական արդարություն՚։ Բացի այդ, շուտով կայքում կլինեն նաև արտաքին քաղաքականության ուրվագծերը և ՀՀ քաղաքական բարեփոխումների կոնցեպտները։ Վերը նշված տնտեսական ծրագիրը ես համարում եմ այն ձեռնոցը, ինչը նետում եմ իշխանությանը։ Այն ծրագիր է բառի բուն իմաստով. կարգախոսների կամ ցանկությունների շարան չէ, կոնցեպրիա չէ, ծրագրային դրույթներ չէ։ Այն սահմանափակ ժամանակի և ռեսուրսների մեջ գործուղությունների համակցություն է, ելքային կոնկրետ արդյունքներով։

Նշժվում է, որ առաջիկայում կտպագրվի դրա գրքույկային տարբերակը, կլինի պաշտոնական շնորհանդես։ Այնպես որ ծրագրում որոշակի, ոչ շատ էական, փոփոխություններ կլինեն։ ՙՇնորհակալություն եմ հայտնում ընկերներիս և ուսանողներիս, թանկագին դիտողությունների համար։ Իշխանությունը չներկայացնող թեկնածուներին՝ խնդրեմ եթե դուք էլ ինձ տրամադրեք ձեր ծրագրերը (կրկնում եմ, սահմանափակ ժամանակի ու ռեսուրսների մեջ մակրոտնտեսական գործունեության պլան, այլ ոչ թե պարզապես ցանկություններ), ապա մեծ հաճույքով կմասնակցեմ ցանկացած բանավեճի՚,- գրել է Բագրատյանը։

ԱրմԻնֆո գործակալության կողմից Երևանի բանկերից ստացված տվյալների համաձայն, տարադրամի փոխանակման բանկային կետերում այսօր ԱՄՆ դոլարի առքի առավելագույն գինը 1 դոլարի դիմաց կազմել է 408.5 դրամ, ԵՎՐՈ-ի առքի առավելագույն գինը`541.5 դրամ, իսկ ռուսական ռուբլու առքի գինը`13.15 դրամ: ԱՄՆ դոլարի վաճառքի առավելագույն գինը կազմել է 410 դրամ, ԵՎՐՈ-ի վաճառքի գինը` 541.5 դրամ, իսկ ռուսական ռուբլու վաճառքի գինը`13.6 դրամ:

 Ստամբուլում սպանել են հերթական հային: Ինչպես հաղորդում է Haberturk-ը, հայկական դպրոցի ուսուցիչ, 40-ամյա ուսուցիչ Իլքեր Շահինը, գտնվել է Քադրքյոլ թաղամասի իր բնակարանում, վիզը կտրված:

Արամյան դպրոցում 9 տարի դասավանդած 40-ամյա Իլքեր Շահինից օրեր շարունակ որևէ տեղեկություն չստացած գործընկերները որոշել են այցելել նրա տուն։ Դուռը փակ տեսնելով` նրանք կասկածել են և դիմել ոստիկանություն։ Ոստիկանությունը, մտնելով տուն, սարսափելի պատկերի է ականատես եղել. նրանք հայտնաբերել են հայ տղամարդու դին՝ վիզը կտրված։ Նրանք ենթադրում են, որ սպանության զոհ դարձած Շահինը երկար ժամանակ պայքարել է մարդասպանի կամ մարդասպանների դեմ։

Հիշեցնենք, որ երկու շաբաթ առաջ Ստամբուլում տարեց հայուհի էր սպանվել։  Մարդասպանը դարձյալ կտրել էր նրա պարանոցը։ Մեկ այլ հարձակում էր իրականացվել ևս մեկ տարեց հայուհու վրա. թեև վերջինիս կյանքը հաջողվել էր փրկել, սակայն նա կորցրել էր մի աչքը։

Հայաստանի նախկին արտգործնախարար, ՙԲարգավաճ Հայաստան՚ կուսակցությունից ԱԺ պատգամավոր Վարդան Օսկանյանը ձեռնարկել է ԲՀԿ առաջնորդ Գագիկ Ծառուկյանի հետ հանդիպելու անհաջող փորձ:

Ինչչես գրում է ՙԺամանակ՚ թերթը, հղումներ կատարելով սեփական աղբյուրներին, հունվարի 10-ին Օսկանյանը ԲՀԿ գրասենյակ է գնացել, որը գտնվում է Երևանի կոնյակի-գինու-օղու գործարանում, կուսակցության առաջնորդի հետ հանդիպելու նպատակով: Ըստ հրապարակման, սպասելով այնտեղ մոտ 2 ժամ, Օսկանյանն այդպես էլ չի արժանացել Ծառուկյանի ընդունելությանը: ՙՊարզ չէ, թե ինչ հարց է նախատեսել քննարկել Ծառուկյանի հետ Օսկանյանը՚,-գրում է թերթը:

Հիշեցնենք, որ ավելի վաղ, ԲՀԿ առաջնորդը հրաժարվել էր առաջիկա նախագահական ընտրություններին մասնակցելուց, հայտարարելով, որ չի սատարելու որևէ թեկնածուի:

Բավրա-Աշոցք ավտոճանապարհին ՙՖորդ՚ մակնիշի մարդատար և ևս  50 ավտոմեքենա է արգելափակվել ձյան մեջ: Այս մասին հաղորդում է ՀՀ ԱԻՆ-ն:

Հունվարի 10-ի` ժամը 17.00-ի դրությամբ, բոլոր ավտոճանապարհները հիմնականում դժվարանցանելի են: Փակ են Սելիմի լեռնանցքը, Ամասիա-Աշոցք-Գյումրի, Թորոս-Բավրա, Առափի-Հայկավան-Ոսկեհասկ, Թալին-Արթիկ-Ապարան, Վերին Գետաշեն-Մադինա, Ալագյազ-Սպիտակ, Հրազդան-Մեղրաձոր, Հատիս-Զովաշեն, Մեղրաձոր-Հանքավան, Արագածի և Ապարանի միջհամայնքային բոլոր ավտոճանապարհները:

Ձնաբքի և վատ տեսանելիության պատճառով դժվարանցանելի են Տիգրանաշեն գյուղի ՙՔյարքիի ոլորաններ՚ կոչվող հատվածը, Երևան-Գյումրի, Գյումրի-Ցողամարգ, Բերդ-Ճամբարակ, Քուչակ-Ապարան-Սպիտակ, Երևան-Վանաձոր, Գավառ-Մարտունի-Վարդենիս, Երևան-Մեղրի ավտոճանապարհի ՙԶանգեր՚ կոչվող ճանապարհահատվածը, Երևան-Սևան ավտոճանապարհը, ինչպես նաև Աշոցքի, Ամասիայի, Ախուրյանի և Անիի տարածաշրջանների միջհամայնքային ավտոճանապարհները: Կատարվում են ճանապարհների մաքրման և մշակման աշխատանքներ:

Վրաստանի ՆԳՆ ԱԻ դեպարտամենտից ստացված տեղեկատվության համաձայն, Ստեփանծմինդա-Լարս ավտոճանապարհը փակ է:

Հայստանի Մարքսիստական կուսակցության առաջնորդ Դավիթ Հակոբյանը հրաժրվեց մասնակցել նախագահական աթոռի համար մղվող պայքարին: Չնայած դրան, Հայաստանի գլխավոր մարքսիստն իր կողմնակիցներին կոչ է արել չհուսահատվել: ՙԱնհրաժեշտության դեպքում ես թատերաբեմ դուրս կգամ` ճիշտ տեղում ու ճիշտ ժամանակին՚,-ընդգծել է նա այսօր Երևանում կայացած մամուլի ասուլիսում:

Ըստ մարքսիստի, ՙքաղաքական լուսավորության՚ տեսանկյունից իր մասնակցությունը նախագահական ընտրություններին կլիներ անհրաժեշտություն: ՙԵս եղել եմ ու կմնամ նախագահական աթոռի լավագույն թեկնածուն՚,-համեստորեն ասել է նա: Սակայն, ինչպես պարզվեց, նրան առաջին հերթին հիասթափեցրել է Հայաստանի Ընտրական օրենսգիրքը, ՙորը հենված է կոռուպցիայի, պռոտեկցիայի և բարոյա-հոգեբանական տեռորի վրա՚:

ՙՔաղաքական որոշ թութակներ պնդում են, որ Սերժ Սարգսյանն ընտրություններում չունի մրցակից: Սակայն դա կարելի պնդել միայն նրա հնարավորությունների ու ընտրական տեխնոլոգիաների առումով, որոնք կօգտագործվեն թագը գրավելու համար՚,-հայտարարել է նա:

Միևնույն ժամանակ մարքսիստը նկատել է, որ վերընտրվելուց արդեն մեկ տարի անց Սարգսյանի համար բավականին դժվար կլինի առանց գաղափարական և տնտեսական փորձ ունեցող շրջապատի իշխանությունը պահպանելը: ՙԵթե նրան չօգնեն, ապա նա կհայտնվի քաղաքական ցայտնոտում՚,-ասել է նա: Այսպիսով, ըստ Հակոբյանի, ներքաղաքական իրավիճակը պահանջում է ազգի կոնսոլիդացում:

Միևնույն ժամանակ, մարքսիստն ուղղակիորեն չի խոսել այն մասին, թե ինքն անձամբ պատրա՞ստ է արդյոք այդ կոնսոլիդացիային: ՙԵթե իմ գլխավոր պահանջը` գաղափարական և տնտեսական նոր ուղեղներից կազմված շրջապատի ստեղծումը չկատարվի, ապա ես առաջինը դուրս կգամ Սարգսյանի դեմ՚,-հայտարարել է մարքսիստը:

Հիշեցնենք, որ նախագահական ընտրությունները Հայաստանում տեղի կունենան 2012 թվականի փետրվարի 18-ին:

 Հայաստանում չկա դոնորական օրգանների վաճառքի մաֆիա, լրագրողների հետ զրույցում հայտարարել է ՀՀ առողջապահության նախարար Դերենիկ Դումանյանը: ՙՆման բան չկա և չի կարող լինել՚,-ընդգծել է նա:

Հիշեցնենք, որ ավելի վաղ Աշտարակի բնակիչ Կարապետ Կարապետյանը կասկածներ է հայտնել իր կնոջ երիկամի հեռացման ցուցումների առկայության առնչությամբ: Փաստացի նա բշիշկներին մեղադրել է մարդկային օրգանների ապօրինի վաճառքի մեջ: Սակայն, Առողջապահության նախարարության տարածած հաղորդագրության համաձայն, Կարապետյանի նախաձեռնությամբ Գերմանիայում անցկացված անկախ դատաբժշկական փորձաքննությունը հաստատել է, որ վիրաբուժական միջամտության ծավալը ճիշտ է ընտրվել, և տվյալ դեպքը վերաբերում է բարդությունների, այլ ոչ թե բժշկական սխալի թվին:

 Դամասկոսի կենտրոնում սիրիացի ժողովրդին ուղղված Սիրիայի նախագահ Բաշար Ասադի ուղերձը վկայում է այն մասին, որ նա կգնա մինչև վերջ, այսօր մամլո ասուլիսի ժամանակ հայտարարել է արաբագետ Սարգիս Գրիգորյանը:

ՙԱսադի կոշտ հայտարարությունը պատասխան էր շրջանառվող այն լուրերին, թե նրա իշխանավարմանը քիչ ժամանակ է մնացել: Այսպիսով`նա կրկին հայտարարել է այն մասին, որ դեռ այդ երկրի նախագահն է, դեռևս կառավարում է իրավիճակը և դիմանալու է մինչև վերջ՚,- հայտարարել է նա:

Նրա գործընկեր Արմեն Պետրոսյանն իր հերթին ընդգծել է, որ այն կետերը, որոնք Սիրիայի նախագահն ընթերցել է այս տարվա հունվարին Դամասկոսի կենտրոնում, որևէ նոր բան չէին պարունակում, այդ ամենը բազմիցս ասվել է արտասահմանյան տարբեր ԶԼՄ-ներին նրա հարցազրույցում:

ՙԱյդ ելույթը վկայում է այն մասին, որ Ասադը հետ չի կանգնել իր մտադրություններից և շարունակում է իր քաղաքական ուղեգիծը՚,- նշել է Պետրոսյանը:

Միաժամանակ նա ընդգծել է, որ Սիրիայում դիմակայությանը վերջ դնելու որոշումը գտնվում է երկրի սահմաններից դուրս, այն պետք է գա դրսից, և առայժմ պարզ չէ, թե հետագայում ինչպես կզարգանա իրավիճակը:

Հունվարի 6-ին Սիրիայի նախագահ Բաշար Ասադը հանդես է եկել սիրիայից ժողովրդին ուղղված պաշտոնական հեռուստաուղերձով`ազգային երկխոսության ճանապարհով ներկայիս ճգնաժամի քաղաքական լուծման կոչ անելով:

 Հունվարի 14-ին Երևանում տեղի կունենա Հայաստանի պետական երիտասարդական նվագախմբի և իտալացի աշխարհահռչակ ակորդեոնահար Մարիո Ստեֆանո Պիետրոդարկիի համատեղ համերգը:

Ինչպես նշել է Պիետրոդարկին այսօր մամլո ասուլիսի ժամանակ, համերգի շրջանակներում տեղի կունենան Մարտին Պալմերի ստեղծագործության համաշխարհային պրեմիերան: Երեկոյի ընթացքում կհնչեն նաև Ռոբերտո Մոլինելլիի, Էնրիկո Բլատտիի, Էննիո Մորրիկոնեի, ինչպես նաև անզուգական Աստոր Պիացոլլայի ստեղծագործությունները: ՙԳիտեմ, որ Հայաստանում շատ են սիրում ՙLibertango՚-ն, սակայն կոմպոզիտորի մյուս աշխատանքները նույնպես ոչ պակաս ուշադրության են արժանի՚,- նշել է ակորդեոնահարը:

Համերգից շահույթի 10%-ը Երիտասարդական նվագախումբը կփոխանցի ՙՆվիրիր կյանք՚ սպիտակարյունությամբ հիվանդ երեխաներին օգնության բարեգործական հիմնադրամին:

Եվրախորհրդի խորհրդարանական վեհաժողովի պատվիրակությունը հունվարի 16-17-ը կայցելի Հայաստան` նախընտրական գործընթացներին ծանոթանալու նպատակով: Ինչպես ԱրմԻնֆո-ին հաղորդել են Երևանում Եվրախորհրդի գրասենյակում, այցի ընթացքում պատվիրակությունը հունվարի 17-ին հանդես կգա մամլո ասուլիսով:

Նախագահական ընտրությունները տեղի կունենան փետրվարի 18-ին: Դրանց կմասնակցեն ՀՀ նախագահ Սերժ Սարգսյանը, ՙԺառանգություն՚ կուսակցության առաջնորդ Րաֆֆի Հովհաննիսյանը, նախկին վարչապետ Հրանտ Բագրատյանը, ՙԱզգային ինքնորոշում՚ միավորման ղեկավար Պարույր Հայրիկյանը,   Լեռնային Ղարաբաղի նախկին արտգործնախարար Արման Մելիքյանը, քաղաքագետ Անդրիաս Ղուկասյանը, էպոսագետ Վարդան Սեդրակյանը և ՙԱզգային համաձայնություն՚ կուսակցության նախագահ Արամ Հարությունյանը:

Հայաստանի նախագահի պաշտոնի համար կպայքարի 8 թեկնածու: Սա թեկնածուների վերջնական ցուցակն է, ովքեր արդեն գրանցվել են ՀՀ ԿԸՀ կողմից: Մնացած 7 հավակնորդները, ովքեր նույնպես որոշել էին մասնակցել նախագահական մրցապայքարին, դուրս են մնացել պայքարից. նրանից երեքը`Ռուբեն Այվազյանը, Ռոբերտ Ահարոնյանը և Տարոն Աբրահամյանը հանել են իրենց թեկնածությունները, չորսը`Ռոբերտ Սիմոնյան, Պավլիկ Սարգսյան, Մհեր Հայրապետյան և Նարինե Մկրտչյանը չեն կարողացել սահմանված ժամկետում`մինչև հունվարի 10-ը`14:00-ն, վճարել ընտրագրավը: Այդ մասին ԱրմԻնֆո-ին հաղորդել են ՀՀ ԿԸՀ մամլո ծառայությունում:

Անհրաժեշտ փաստաթղթերը ներկայացրել են 8 թեկնածու` ՀՀ նախագահ Սերժ Սարգսյանը, ՙԺառանգություն՚ կուսակցության առաջնորդ Րաֆֆի Հովհաննիսյանը, նախկին վարչապետ Հրանտ Բագրատյանը, ՙԱզգային ինքնորոշում՚ միավորման ղեկավար Պարույր Հայրիկյանը,   Լեռնային Ղարաբաղի նախկին արտգործնախարար Արման Մելիքյանը, քաղաքագետ Անդրիաս Ղուկասյանը, էպոսագետ Վարդան Սեդրակյանը և ՙԱզգային համաձայնություն՚ կուսակցության նախագահ Արամ Հարությունյանը:

 Ռուս-վրացական սահմանում գտնվող ՙՎերին Լարս՚ հսկիչ անցակետը կարող է անցնել աշխատանքի շուրջօրյա ռեժիմի: Այդ մասին ասվում է ՙՌուսաստանի և Հայաստանի միջև պարենային ապրանքների ներմուծման և արտահանման  կարգավորման, ինչպես նաև դրանց անվտանգության ապահովման համար պետական միջոցների ծախսման նկատմամբ Հայաստանի Հանրապետության Վերահսկիչ պալատի և Ռուսաստանի Դաշնության Հաշվիչ պալատի համատեղ վերահսկողության արդյունքների վերաբերյալ՚ հաշվետվությունում:

ՀՀ Վերահսկիչ պալատի և ՌԴ Հաշվիչ պալատի համատեղ ուսումնասիրությունում առաջարկվում է աշխատանքի շուրջօրյա ռեժիմ սահմանել ՙՎերին Լարս՚ հսկիչ անցակետում և ավելացնել անձնակազմի թվաքանակը, ինչը ծախսերի նվազեցման և ակցիզային հարկով հարկման ենթակա ապրանքների ներմուծման համար նպաստավոր պայմաններ ստեղծելու նպատակ է հետապնդում:

 ՙՀայ-ռուսական հասարակական միավորման՚ առաջնորդ Ռոբերտ Ահարոնյանը և Հայաստանի կոբուդո մարտական կարատեի ֆեդերացիայի նախագահ Տարոն Աբրահամյանը հունվարի 10-ին հայտարարել են, որ չեն շարունակելու նախագահական մրցարշավը:

Նրանք իրենց որոշումը պայմանավորել են այն հանգամանքով, որ հայ հասարակությունը պատրաստ չէ արմատական փոփոխությունների: Որպես օրինակ սոցիալիստական գաղափարախոսության կողմնակից Ահարոնյանը նշել է, թե Հայաստանն իր քաղաքական վեկտորը պետք է ուղղի դեպի Ռուսաստան և վերստեղծի ԽՍՀՄ ժամանակների բարքերը, անտեսելով այն փաստը, որ ՌԴ-ում տիրում է կապիտալիզմ, իսկ ՀՀ և ՌԴ հարաբերություններն առանց այդ էլ գործընկերային են: Մարզիկ և կարատեիստ Տարոն Աբրահամյանն իր հերթին հայտարարել է, թե ինքն ունի  նախագահական ընտրություններին մասնակցելու բոլոր հնարավորությունները` թե ֆինանսական միջոցներ, թե ՙոգի՚, սակայն բացակայում է հասարակական և քաղաքական աջակցությունը: Նրա ասելով, ինքն ակնկալում էր իշխանություններից վիրավորված բարձրաստիճան պաշտոնյաների աջակցությունը, որոնք իր հույսերը չարդարացրեցին` հրաժարվելով աջակցել իրեն:

Հիշեցնենք, որ նախօրեին նախագահական մրցարշավին մասնակցությունից հրաժարվելու մասին հայտարարել էր ԲՀԿ անդամ, փաստաբան Ռուբեն Այվազյանը` դա պատճառաբանելով ֆինանսական խնդիրներով:

Մինչդեռ, այն դեպքում, երբ քիչ հայտնի երեք թեկնածուները հանձնեցին դիրքերը և ՙդադար՚ վերցրեցին մինչև հաջորդ նախագահական ընտրությունները, էպոսագիր Վարդան Սեդրակյանը, ով, ինչպես պարզվեց, իրականում ճարտարապետ շինարար է և ոչ մի բանասիրական կամ պատմական կրթություն չունի, շարունակում է հարձակումը Բաղրամյան 26-ի ուղղությամբ: Ընդ որում նա բազմիցս հայտարարել է, որ ընտրվելու է ձայների 81 տոկոսով և հայ հասարակությանն ու երրորդ հանրապետության բոլոր երեք նախագահներին խորհուրդ է տվել որպես նախընտրական ծրագիր  կարդալ ՙՍասնա ծռեր՚ էպոսը: Հավակնոտ Սեդրակյանն ավելի վաղ նաև հայտարարել էր, թե Հայաստանի երեք նախագահները` Լևոն Տեր-Պետրոսյանը, Ռոբերտ Քոչարյանն ու Սերժ Սարգսյանը, փետրվարի 18-ից հետո կլինեն իր ավագ խորհրդականները: Արժե նաև նշել էպոսագրի բարձր մարտական ոգին, որն ուժ է ստանում հայկական էպոսից: Նա նաև հայտարարել է, թե ՀՀ նախագահի պաշտոնում անհապաղ կճանաչի Աբխազիան և Հարավային Օսիան և կնվաճի Թբիլիսին, որպեսզի Հայաստանը ցամաքային կապ ունենա Ռուսաստանի հետ:

Անհայտ թեկնածուների և նրանց անհեթեթ գաղափարների ցանկը սրանով չի սահմանափակվում. նախընտրական շոուին իր մասնակցությունը շարունակում են ՙՔաշաթաղ՚ հասարակական կազմակերպության նախագահ Ռոբերտ Սիմոնյանը, կենսաթոշակառու Պավլիկ Սարգսյանը, գործազուրկ Մհեր Հայրապետյանը` եթե, այնուամենայնիվ, կարողանան վճարել ընտրագրավը:

Հաշվի առնելով առաջիկա ընտրությունների ՙլրջությունն՚ ու նախընտրական ծրագրերի ՙվիթխարիությունը՚` մնում է միայն հաջողություն մաղթել բոլոր թեկնածուներին և, մասնավորապես, հայտնի թեկնածու-քաղաքական գործիչներին, որպեսզի նրանք, այնուամենայնիվ, կարողանան ներկայացնել հումորի տեսանկյունից մրցունակ նախընտրիական ծրագրեր և վարել աշխույժ քարոզարշավ` ԶԼՄ-ների լուսաբանման տեսանկունից: Քանզի գոնե մի փոքր հումոր ունեցող լրագրողի համար դժվար է անցնել այն թեկնածու կողքով, որը պատկերացում չունի Հայաստանի պետական ինստիտուտների և Սահմանադրության մասին:

 Հունվար ամիսը նշանավորվեց առատ տեղումներով և ձյան բարձր ծածկույթով:

 Հայաստանի դիրքերի բարելավումը Heritage Foundation-ի եւ Wall Street Journal-ի համատեղ հաշվետվության տվյալներով կազմված տնտեսական ազատության ինդեքսի վարկանշային աղյուսակում խոսում է հանրապետության գործարար մթնոլորտի էական բարելավման մասին և կարևոր նշանակություն ունի տնտեսական բարեփոխումների խորացման համար: Այդ մասին հայտարարել է վարչապետ Տիգրան Սարգսյանը կառավարությունում` մեկնաբանելով ՙՏնտեսական ազատության ինդեքս 2013՚ զեկույցը։

Վարչապետը նշել է, որ Հայաստանի դիրքերի բարելավումը լավատեսություն է ներշնչում ապագայի հանդեպ և հանրապետությունն ավելի հրապուրիչ դարձնում օտարերկրյա ներդրողների համար: Նա ավելացրել է, որ կառավարությանը 2013-ին լարված  և արդյունավետ աշխատանք է սպասում, ինչի համար լավ հիմք է դրվել նախորդ տարում:

Հիշեցնենք, որ Հայաստանը 38-րդ տեղն է զբաղեցրել ամերիկյան Heritage Foundation-ի եւ Wall Street Journal-ի` երկրների տնտեսական ազատության մակարդակի համատեղ հետազոտության արդյունքում կազմված վարկանշային աղյուսակում: Զեկույցի հեղինակները Հայաստանի ՙՏնտեսական ազատության ինդեքսը՚ գնահատել են 69,4 բալ, այդպիսով` նախորդ հետազոտության համեմատ երկիրն  իր դիրքը բարելավել է 0.6 կետով: Հայտնվելով 38-րդ տեղում` Հայաստանն ընդգրկվել է չափավոր ազատ տնտեսությամբ երկրների շարքում: Տարածաշրջանի երկրների շրջանում լավագույն ցուցանիշ է գրանցվել Վրաստանում, որն զբաղեցրել է 21-րդ տեղը: Վրաստանը ներառվել է ՙհիմնականում ազատ տնտեսություն ունեցող՚ երկրների շարքում: Ադրբեջանի ցուցանիշներն ավելի վատ են. այդ երկրի տնտեսական ազատության ինդեքսը գնահատվել է 59,7 բալ:

 Կովկասի մահմեդականների վարչությունը (ԿՄՎ) պնդում է Հայաստանի և Ադրբեջանի հոգևոր առաջնորդների հանդիպման անցկացումը հայ-ադրբեջանական սահմանում, այլ ոչ թե` ԼՂՀ և Ադրբեջանի  զինված ուժերի շփման գծում:

ՙՀանդիպումը, եթե այն տեղի ունենա, կարող է կայանալ միայն ադրբեջանահայկական սահմանում՚, - նշվում է ԿՄՎ հաղորդագրությունում, որը վկայակոչում  են ադրբեջանական ԶԼՄ-ները:

Ավելի վաղ հաղորդվել է, որ Ամենայն հայոց կաթողիկոս Գարեգին Երկրորդը Կովկասի մահմեդականների վարչության նախագահ շեյխուլիսլամ Ալլահշուքյուր Փաշազադեին առաջարկություն է հղել ԼՂՀ և Ադրբեջանի զինված ուժերի շփման գծում հանդիպում անցկացնելուը վերաբերյալ: Առաջարկությունը շեյխին է հանձնվել Վրաստան նրա այցի ընթացքում` վիրահայ թեմի եպիսկոպոս Վազգեն Միրզախանյանի կողմից:

 2012 թվականի մայիսի 5-ից մինչև 2013  թվականի հունվարի 6-ն ընկած ժամանակահատվածում Հայաստանի ընտրողների նախնական ցուցակը համալրվել է 25 053 քաղաքացիով: Այդ մասին հաղորդում է ՀՀ ոստիկանության մամուլի ծառայությունը:

Աղբյուրի համաձայն, 2012 թվականի մայիսի 5-ին կայացած խորհրդարանական ընտրությունների պահին հանրապետության ընտրողների թիվը կազմել է 2 485 844 մարդ: Անձնագիր ստանալու, զորացրման, չափահաս դառնալու առնչությամբ ընտրողների ցուցակում ներառվել է 60 645 քաղաքացի (նրանցից 29 986-ի 18 տարին լրացել է): Միևնույն ժամանակ, մահվան պատճառով, դիմումի հիման վրա և այլ պատճառներով հաշվառումից հանվել է 35 592 մարդ (նրանցից 15 572-ը մահացել է):

ԱՄՆ վարչակազմը, չնայած Ռուսաստանի հետ առկա տարաձայնություններին, պատրաստ է երկու երկրների միջև համագործակցության տարբեր հարցերի շուրջ: Այդ մասին հայտարարել է Պետդեպարտամենտի պաշտոնական ներկայացուցիչ Վիկտորիա Նուլանդը, ում խոսքերը վկայակոչում է ՙԱմերիկայի ձայնը՚:

ՙՄենք ձգտում ենք հնարավորինս գործուն կերպով համագործակցել Ռուսաստանի հետ  փոխադարձ հետաքրքրություն  ներկայացնող հարցերի հնարավորինս լայն շրջանակի շուրջ, լինեն դրանք երկկողմ հարաբերություններին առնչվող կամ տարածաշրջանային հարցեր, ինչպիսին է, օրինակ, իրավիճակը Լեռնային Ղարաբաղում, կամ` գլոբալ հարցեր, ինչպիսիք են Իրանը, Աֆղանստանը, Սիրիան և այլն: Միևնույն ժամանակ մենք մտադիր ենք միանգամայն հստակ և բացահայտ կերպով հայտարարել մեր դիրքորոշման մասին տարաձայնությունների դեպքում, որոնք գոյություն ունեն, մասնավորապես, Ռուսաստանում մարդու իրավունքների, ժողովրդիավարության որակի, ինչպես նաև Սիրիայում առկա իրավիճակի և այլ հարցերի առնչությամբ՚, - ընդգծել է Նուլանդը:

ԱԺ նախագահ Հովիկ Աբրահամյանը հունվարի 9-ին Բրյուսել պաշտոնական այցի ընթացքում հանդիպում է ունեցել Եվրոպական ընդլայնման եւ հարեւանության քաղաքականության հարցերով ԵՄ հանձնակատար Շտեֆան Ֆյուլեի հետ: Ինչպես ԱրմԻնֆո գործակալությանը հաղորդեցին ԱԺ հասարակայնության եւ տեղեկատվության միջոցների հետ կապերի վարչությունից, հանդիպման ժամանակ կողմերը քննարկել են ՀՀ-ԵՄ հարաբերությունների զարգացման հեռանկարները, բարձր գնահատել արդեն իսկ արձանագրված քաղաքական երկխոսության դրական դինամիկան եւ երկուստեք այն պահպանելու եւ շարունակելու պատրաստակամություն հայտնել:
Նշվել է, որ առաջընթաց է արձանագրվել ՀՀ-ԵՄ բանակցային գործընթացում` Ասոցացման համաձայնագրի եւ Խորը ու համապարփակ ազատ առեւտրի գոտի ստեղծելու ուղղությամբ, միեւնույն ժամանակ բանակցությունները 2013 թվականին ավարտին հասցնելու պատրաստակամություն է հայտնվել, ինչը նոր որակ կհաղորդի Հայաստան-Եվրամիություն հարաբերություններին: Անդրադարձ է եղել նաեւ ՀՀ-ի տնտեսական եւ ժողովրդավարական ներքին բարեփոխումների ընթացքի վրա այդ գործընթացի դրական ազդեցությանը: Խոսվել է մուտքի արտոնագրերի եւ հետընդունման բանակցային գործընթացն ավարտելու եւ պայմանագրերի շուտափույթ վավերացման անհրաժեշտության մասին: Կարեւորվել է այդ պայմանագրերի իրագործումը, ինչը ճանապարհ կհարթի դեպի մուտքի արտոնագրերի ազատականացումը ՀՀ քաղաքացիների համար: Շտեֆան Ֆյուլեն իր հերթին երախտագիտություն է հայտնել ՀՀ կառավարության որոշման համար, որով ԵՄ քաղաքացիները կարող են առանց վիզաների ձեռքբերման մուտք գործել Հայաստան: Կարեւորվել է նաեւ ՀՀ իշխանությունների պատրաստակամությունը ազատ եւ եվրոպական չափանիշներին համապատասխան նախագահական ընտրություններ անցկացնելու վերաբերյալ: Հանդիպման վերջում ԱԺ նախագահ Հովիկ Աբրահամյանը մեկ անգամ եւս շնորհակալություն է հայտնել ակտիվ համագործակցության համար եւ հավաստիացրել, որ Հայաստանը պատրաստակամ է հնարավորինս կիրառելու համագործակցության հնարավորություններն ու գործիքները:

ՀՀ Ազգային ժողովի նախագահ Հովիկ Աբրահամյանը նույն օրը հանդիպել է Բելգիայի Թագավորության Սենատի նախագահ Սաբին դը Բեթյունի եւ Ներկայացուցիչների պալատի նախագահ Անդրե Ֆլաոյի հետ: Հանդիպման ժամանակ կարեւորվել են երկու երկրների միջխորհրդարանական համագործակցությունն ու շփումների ակտիվացումը, այդ թվում` խորհրդարանական բարեկամական խմբերի եւ մշտական հանձնաժողովների անդամների փոխայցելությունները: Կարեւորվել է նաեւ միջազգային կազմակերպությունների խորհրդարանական վեհաժողովներում խորհրդարանականների սերտ համագործակցության հաստատումը: Քննարկման ժամանակ կարեւորվել է ՀՀ-ԵՄ հարաբերությունների զարգացման հեռանկարը, այդ թվում` այն փաստը, որ ԵՄ Արեւելյան գործընկերության նոր գաղափարախոսության հիմքում ընկած է ՙավելին` ավելիի դիմաց՚ սկզբունքը, որը նախատեսում է Եվրամիության կողմից գործընկեր երկրներին ավելի շատ աջակցության տրամադրում` ավելի շատ բարեփոխումների դիմաց: Անդրադառնալով Հայաստանում իրականացվող բարեփոխումներին` ԱԺ նախագահը վստահեցրել է, որ, անկախ տարածաշրջանում առկա խնդիրներից եւ մարտահրավերներից, Հայաստանը հաստատակամորեն ընտրել է պետականաշինության ժողովրդավարական ճանապարհը: Հայաստանը հաստատակամ է եվրոպական չափանիշներին համապատասխան խորքային եւ համակողմանի բարեփոխումները շարունակելու հարցում: Եվրամերձեցման քաղաքականությունը Հայաստանի համար ոչ միայն ներքին բարեփոխումների, այլեւ արտաքին քաղաքական օրակարգի առանցքներից է:

Հովիկ Աբրահամյանն անդրադարձել է ԼՂ հակամարտության կարգավորման գործընթացին, նշելով, որ հայկական կողմի դիրքորոշումը հիմնված է միջազգայնորեն ընդունված երեք սկզբունքների վրա. դրանք են` ուժի եւ ուժի սպառնալիքի չկիրառումը, ազգերի ինքնորոշումը եւ տարածքային ամբողջականությունը: Ադրբեջանը շարունակաբար խոչընդոտում է այս գործընթացին՝ կառուցելով իր քաղաքականությունը միայն մեկ՝ տարածքային ամբողջականության սկզբունքի վրա: ԱԺ նախագահի գնահատմամբ` այս մոտեցմամբ հնարավոր չէ խոսել փոխզիջումների մասին:
Հովիկ Աբրահամյանը նշել է նաեւ, որ Ադրբեջանը, խեղաթյուրելով հակամարտության էությունն ու հետեւանքների բուն պատճառները, նաեւ քայլեր է ձեռնարկում հակամարտության կարգավորման մեջ ներքաշելու այլ միջազգային կազմակերպությունների, փորձելով խոչընդոտել բանակցային գործընթացը եւ հետապնդելով քարոզչական նպատակներ, ինչը միանգամայն անընդունելի է:

ԱԺ նախագահ Հովիկ Աբրահամյանի հաջորդ հանդիպումը ԵԽ ԵԺԿ խմբակցության ղեկավար Ժոզեֆ Դոլի հետ էր: Հանդիպման ընթացքում անդրադարձ է եղել Հայաստան-Թուրքիա հարաբերությունների կարգավորման հարցին: ԱԺ նախագահը նշել է, որ այս հարցում Հայաստանը մշտապես հանդես է եկել կառուցողական նախաձեռնություններով, հավատարիմ է մնացել Ցյուրիխում ստորագրած արձանագրությունների ոգուն եւ պատրաստակամ է առանց նախապայմանների կատարելու իր ստանձնած պարտավորությունները: Այնինչ Թուրքիան շարունակում է առաջ քաշել արձանագրություններում բացակայող նախապայմաններ, որոնք ի սկզբանե անընդունելի են Հայաստանի համար: 
Հունվարի 10-ին ԱԺ նախագահ Հովիկ Աբրահամյանը պաշտոնական հանդիպումներ կունենա Եվրախորհրդարանի նախագահ Մարտին Շուլցի եւ Եվրոպական խորհրդի նախագահ Հերման վան Ռոմպուի հետ: